Ondangere yOmbandi, Kamaijanda Haisuua Maiseuanaaṋi nOmbara Rikurura Kukuri Oritjavari va womborere ovimbumba okutwara kongungu yomuyaruke Ombara Kamaituara Kukuri, ombangaṋe yovita vyo 1904.

Orutu rwe pu rwa sewa nokuimbirahi i yotjihoromende tjohuurire tjEhi rOvandoitji tjovezepe vayo tji va za nokuturika komuti okuza nokumukawondjisa pehi okuza kOmbakaha tji ve mu kambura kehi yotjiwova kutja ya tye ohange nungwari tjandje otjineya uriri. Ndino ndi ndji tjiukwa otjohange yOmbara Mbakaha Kumaituara Kukuri ka kamburirua. 

Oruzenga kuye rwa twiirwe po Oritjavari otjorupa rovitjitwa ongondoroka nOmazemburukiro wEyuva rOtjiṱiro Otjindjandja. Ngari mEyuva rOtjiṱiro Otjndjandja Oritjatatu. Ohoromende ngu ya zemburukire otjikando otjitenga pOtjikunino tjOndjuwo yOzoveta. Ngunda wina pondondo yotjiwaṋa tjOvaherero nOvambanderu, nOvakwena otjozondekurona azari nomazemburukiro poruveze rOmihoko Omikutasane mOkatutura ndu tjiukwa otjOUN Plaza. Ondangere Miaiseuanaaṋi Oritjavari pa tjirirwe ama yakisa omuriro wokuningirira po kovaṱi novakuru ama hepura kutja epaha ra wana mari ve zemburuka nOtjiṱiro tjawo. 

Tjazumba otjimbumba otji tja ire kongungu yOmbara Kamaituara Kukuri pu tja katwapere otuzenga tuvari. Rumwe ronganda oini yombandi na rarwe rozombara za Kandjoze. Tjazumba otjimbumba hi atji tinyauka kOUN Plaza tji kerikwambe kovimbumba vyarwe mbya utire okuvaza ohozohozo poruveze indwi okurikuta kovitjitwa pekepeke mbya ri ko tjimuna omahungi ongondoroka nomazemburukiro wOtjiṱiro ngari mozondi mbari yovatjiwe mba katuwa pehi tjimuna okaṋepo okakuru kondjuwo yoveta, Raṱoveni Kavekotora, Onongo Ellison Tjirera, omutjiwe womaunguriro wakumwe pokati komahi Pius Dunaiski, ondekurona okuza kEhozutjikuze, Celia Stephanus Tjikuirire nonḓiṱona konganda yomahongero wokombanda, Ounama, Pekara Kuvera. 

Ependukirwa , indi Eyuva rOmazemburukiro wOtjiṱiro Otjindjandja orini, tji ye ri 28 ku Kambundu, Oritjatatu, ovimbumba avi  kayenda pehi amavi hongorerwa po ozongoro zovita avi hungama otjihuro pu pa katwiirwe oruzenga amaavi kerikuta kotjitjitwa tji tja ri pOtjikunino Tjondjuwo Yozoveta otjo tji tjari kehi yohoromende omuhungire weyuva ngwari Operesindenda, Netumbo Nandi-Ndaitwah.  Ongahukiro kutja mu nda sere okurira eyuva razo nu muro ozondekurona muze ha mwine oruveze pOtjikunino kutja okurira, poo okunonota, ozo za serwe nondjara nonyota. Mu nao pu za kaseninine amaze riri ombumbuhoze potjitjitua tji zari natjo pOUN Plaza. Ozo pu za kauharere neyuva ndi kombunda ayo ya karirire ongurova. Nombara Otjitambi yOvambanderu ngwa ririre imwe yozombara ozosenina ama huhumiṋa ozondekurona meyuva nda sokurira orazo posi ya ndi ha ri orazo.