Omukandi wOmaimburiro mau ṱike kokure omanyomoneno wombwaneno, ondengasaneno noupaturuke mokati kOvahererro nOvambanderu.
Kainangura Hikuama, okaṋepo kondjuwo yozoveta yEhi ra Tjauana, wa tjere nao tjari omuhungire omuṋangwa pomukandi imbwi mehi ndo motjirongo Olekotswane Oroviungura nda zuko. Na tja omaimburiro poo omizumbi oruveze orure vi kara otjiungurisiwa motjirwa ku nohuurire mouye na momakuruhungi. Imba kehi yoṋiṋikizire tjaave u tanaurire omasa wawo wokuwanisa movirwa vyawo, okuṱiza ovirumatwa vyawo nokuriworonganisa.
Omuzumbi potuingi wari eraka romuravaere mokuti ongaango ndaari yeta ovandu pamwe kutja ve rimune otjomundu umwe nondando imwe otjovahuurwa novaririsiwa vovakarere. ™Ovaherero nOvambanderu mOtjauana tjingetjo tjinga wina averi oviutwa vyohuurire nozondekurona zOtjiṱiro Otjindjandja tjEhi rOvandoitji,∫ Hikuama ma tja. Na weza kutja omaimburiro nomatangero maye yenene okuungurisiwa `okutuwanisa momaṱuṱuminino wombazu yetu. Okutunduuza oupamwe nepango’. Nu maye yenene okurira omiano vyokuṱiza ovirumatwa vyetu nokuyorokera ozongaro novitjitwa vyomihoko vyetu, eraka nomakuruhungi. Okuyauza onḓengu yombazu na wina okupirura omazengisiro wombazu nomaṋiṋino. Ma tja ye ravaera ombepo yombwaneno; outonga wombazu nomaundjiro momitanda vyOvaherero nOvambanderu.
™Ovambanderu nOvaherero ve kuruhungi ekoto rokurambwa kOnamibia mena roviṱukaungura vyohuurire momautiro weserewondo oritja 21, oruveze orure va kondja okuṱiza ombazu yawo yapeke kuyo oini nokuzemburukwa okuura mOtjauana. Otjiheimukuru noviungura vyovaṱi novakuru, omukandi weṋu we ya moruveze ndu ri ro. Tji turi momutambo waumwe wovazandona va Afrika, Ngugi wa Thiongo, ngwa ṱire tji ya ri 28 ku Kambundu, 2025, omutjange omutjiukwa wozongari neraka raina. Otjeri otjitjitwa tji tjiri tjo okumuperapo ondjozikiro. Nai otja tji me mu tunduuza kutja mu hungame otjikamba meyuru. Otja ku Hikauama tjimwe tjoviṋa ovinene mourizemburuka wa Wa Thiongo yari ohepero yeraka. Membo re indi: “Okukutura Ourizemburuka“,me raisa omuano eraka mbwaa riungurisiwa ovahuure mokukoza omaraka wovahuurwa nokuhonaparisa ingo wovahuure kutja ve huurirepo ovahuurwa.
“Kovambanderu nOvaherero mOtjauana ihi matji hee kutja ovo ve sekame okututumuna nokunyomona eraka Otjiherero/Otjimbanderu. Okuhungira, okutjanga nokutjita meraka roye omapiririro nomeritwapero, na wina okukotora ovyoye vyombazu nokuviyarurapo omuini”.