Omukainhu weedula 19 e li meetelelo leemwedi hetatu okwa kengelelwa eshi a tulwa komukainhu mukwao mokatoo va dja naye moshipangelo shaNandjokwe momafiku 12 omwedi ou.
Omukainhu oye Martha Haindji omukalimo wokomukunda Omunyekadi moshitukulwa shaHangwena.
Omukainhu okwa ninga oule woshivike ta kongwa kopolifi konima eshi a kana okudja moshipangelo shaNandjokwe mosaala yokupulumunina.
Nakuningwa oshihakanwa okwa lombwelwa komukainhu mukwao ou va shakena naye moshipangelo opo e mu kwafele eenomola domavalulilo ombaanga yaye opo ku tuminwe oshimaliwa shaye N$6 000.
Haindji okwa udanekelwa kutya otava topola oshimaliwa pokati ngeenge osha
tumwa.
Haindji okwa hokololela Kundana Etitatu ta ti omukainhu okwe u ya puye ta kwena ta pula ekwafo opo a kwafelwe eenomola dombaanga ku tuminwe oshimaliwa shaye ashike okwa li e na oumbada shaashi ke mu shi.
Konima y kafimbo omukainhu okwe mu lombwela opo vaye naye kombaanga va ka nane ko oshimaliwa ashike konima eshi va ya inava alukila vali moshipangelo efiku olo.
“Eshi twa ya tu ka naneko ko oshimaliwa okwa lombwela nge tu kwate olefa tu ye vati kOshakati ashike okwa lombwela nge kutya inandi lombwela ovakulunhu vange kutya otu li peni,” Haindji hokolola.
Okwa ti ongodi yaye oya kala ya dima efiku tuu olo va dja moshipangelo nomukainhu mukwawo.
“Mefiku tuu olo efimbo longuloshi kongodi ya meme yopeke okwa dengelwa komunhu ta pula ku tuminwe oshimaliwa N$800 ta ti kutya onda tuminwa koshapangelo shaShakati onda pumbwa oshimaliwa shokulikwafela,” Haindji ta hokolola.
Ina yaHaindji okwa ka kala ta tuminwa nomwatumwalaka oipupulu ta pulwa oshimaliwa yee ta lombwelwa kutya okaana kaye oka monika ohonde ya londa ke li meembete.
Eshi ina yaHaindji a dengela koshipangelo shaShakati okwa lombwelwa kutya Haindji ina tambulilwa koshipangelo shaShakati.
Haindji okwa ti ova kala oule woshivike hava di polukanda Uupindi mOshakati ponhele yondingosho pamwe nomukainhu oo oshoyo omukainhu mukwao ha landifa mondingosho.
“Ongodi yange yopeke oya kala i li kuina yomukainhu ou twa dja naye kOshakati shaashi vati ngeenge onda kala nongodi ohandi kala ndi popye apa ndi li,” Haindji ta hokolola.
Okwa ti ina yomukainhu ou a dja naye moshipangelo okwa kala te mu lombwele kutya okwa popya nale novakulunhu vaye, yee vati okwa dengela nokoshipangelo kutya oku li peni onghee okwa kala ta lombwele Haindji oipupulu.
Haindji okwa monika Etitatu eshi a dengela ina ndele te mu shivifile kutya oku li peni nokonima ina okwa tuma ko omunhu e ke mu tale ko kOshakati.
Ongodi yaye yopeke oi li komukainhu ou va dja naye koshipangelo ashike eshi tai dengelwa oya dima.
Ota shuna koshipangelo opo a ka telele okupulumuna okaana kaye shaashi oinima yaye okwa li ei fiya koshipangelo.
Okwa kunghulila oshiwana opo shi kale sha kotokela ovakainhu shaashi vati ovakainhu vopaife navo ove lininga ookalyamupombo eshi hava kala tava tula ovanhu mokatoo.
– fhamalwa@nepc.com.na