Omukulupe weedula 79 vati okwa kwatwa onghonga komonamati weedula 40 meumbo lavo efimbo lokomatango. Oshiningwanima osha ningwa oshivike sha dja ko komukunda Okomakwiya moshikandjohoololo Onesi, moshitukulwa shaMusati.

Omukulunhu koshikondo shokukonakona oimbuluma yopolifi moshitukulwa shaMusati omupedu Commissioner Moses Simaho okwa hokolola ta ti omulumenhu vati oha udu ondaka tai mu lombwele kutya na ye moixulo naina.

Opolifi oya hokolola tai ti omulumenhu ou okwa nhukila omukulupe noku mu longela omunyonena wopaixulo. Otaku hokololwa kutya omufekelwa kakwa li a nwa omalodu, ye ina didilikwa e na oupyakadi woudu wopamadilaadilo.

Omufekelwa okwa kwatwa po nota holoka momhangu nena.

Oshiningwanima shikwao, okakadona keedula 17 oka kwatwa onghonga nokupewa eteelelo komulumenhu womushiinda shavo.

Oshiningwanima osha ningwa neudo momwedi Januali komukunda Okando moshikandjohoololo shaKalongo.

Otaku hokololwa kutya omulumenhu ou okwa nukila okaana ndele te ka longele omunyonena wopaixulo. Nakuninga oshihakanwa oku na eteelelo leemwedi hamano paife. Opolifi oya ti omufekelwa oku shivike ashike ina kwatwa po molwaashi opolifi oye lipyakidila nokuninga omakonakono.

Simaho okwa kumaida oshiwana shi lopote oibofa yomakwatonghonga pefimbo noshoyo okutwala omunhu diva a ninga oshihakanwa shokukwatwa onghonga koshipangelo.

Okwa kumaida oshiwana opo shi longele kumwe nopolifi okulwifa oimbuluma unene tuu omakwatonghonga nomahepeko omomaumbo.

-fhamalwa@nepc.com.na