Abraham Mwanyekange 

Osheendo okudja koshitopolwa shOhangwena osho kwali sha kwatelwa komesho komunashipundi Ephraim Shipindo okwa li sha kala omutumba nelelo loRoad Authority (RA) Etivali loshivike sha dja ko moWindhoek. 

Shipindo okwa ti enenediladilo losheendo okwa li okuyandja omakemo nomaupyakadi aa a kala a taalela oshitopolwa shOhangwena. 

Okwa tumbula nokutya oshitopolwa oshi na eembinga mbali ngeenge tashi ya poukwatya weepate, imwe oyokoushilo oko ku na efululu omanga ikwao oyokouninginino oyo ya kondekwa komeva efundja. 

“Okwa li nee twa ka kala omutumba opo tu tale kutya eepate domOhangwena ohatu i nado komesho ngahelipi,” Shipindo ta ti. Omunashipundi okwa ti keenhele dimwe ngaashi oupangelo neefikola ihaku fikwa komahauto omolwomhumbwe yeepate, ta ti naasho ohashi i moshipala okuyandja omakwafo opapangelo koshiwana. Shipindo okwa ti oku na elinekelo kutya epangelo otali ka nyamukula mouwa wOHangwena. Shipindo okwa ti okwa didilikwa omakwatafano eendjila e li 40 a talika ko kutya ngeenge efundja le ya ohaa ningwa oshihakanwa, ta weda ko ta ti ei oyo yomuimwe va yandja opo i talike ko meendelelo. “Ekwatafano liwa pokati koshitopolwa noRoad Authority otali twikile, opo ovanhu vetu va kwafwe”, Shipindo ta ti. -abbenghilai@gmail.com