WINDHOEK – Richard Kannedy Haoseb omukalimo wokolukanda Kanaan moGobabis ou ta tamanekwa oibofa yomakwatonghonga neteyo lomaumbo okwa pewa omhito komhangu yopombada opo a ningilwe omakonakono opamadilaadilo.

Edi oda popiwa komupanguli komhangu yopombada yaWindhoek Dinnah Usiku, Omandaxa pefimbo Haoseb a holoka momhangu. Hahende wopaumwene Eliaser Shikwa ou akalelapo Haoseb, okwa lombwela omhangu ta ti omutamanekwa ou okwa li ashike a ningilwa omakonakono opamadilaadilo konima eshi a kwatwa po. Shikwa okwa ti Haoseb okwa kala ha mono oilulu ikwete eendjebo neembele okudja pefimbo e na omido heyali.

Okwa hokololela omhangu ta ti Haoseb ina ningilwa nale omakonakono opamadilaadilo okudja pefimbo a li okamatyona. Okwa koleka ta ti okwa ningilwa ashike omakonakono omudo wa djako konima a kwatwa po. Shikwa okwa ti okwa didilika ounghundi wopamadilaadilo waHaoseb eshi a kala nokuya naye meenghundafana kombinga yoshibofa shaye. “Okudja opo onda tala mokakalata kaye koshipangelo omo mwa shangwa kutya oku na oupyakadi wopamadilaadilo,” Shikwa a lombwela omhangu.

Omuetiwoihokolola yepangelo, Advocate Palmer Khumalo okwa lombwela omhangu ta ti ke li omhinge neindilo opo Haoseb a ka ningilwe omakonakono opamadilaadilo. Okwa weda po ta ti omhangu oi na okuninga etokolo ngeenge Haoseb ota ningilwa omakonakono opamadilaadilo omafiku 30. Lwopokati opo, omupanguli omukulunhu Usiku okwa yandja elombwelo opo Haoseb a twalwe koshipangelo nelalakano a ka ningilwe omakonakono ounghundi wopamadilaadilo.

Okwa ti oidjemo yomakonakono aHaoseb nai kale ya tumwa komhangu moule womafiku 30. Usiku okwa undulila oihokolola ei kefiku 1 Juli 2025. Haoseb okwa lombwela omhangu ta ti kena ondjo moibofa itanho yekwatonghonga noshoyo moibofa ivali yeteyolomaumbo.

Omulumenhu ou okwa ti ota lundilwa kombinga yoibofa ine omo ta tamanekwa kutya okwa vaka noshoyo shimwe shokukwatapo omunhu ombabyona. She li kwatelela komhangu, Haoseb okwa teya eumbo momudo 2015 pefimbo olo ovanhu kwa li va kofa ndele teva ningile omatilifo nondjebo nokuvapula omaliko avo.

Konima eshi ovakainhu ovo kwa li ve li meumbo va yandja eengodi davo dopeke noimaliwa, Haoseb okwa kwatwa omukainhu umwe onghonga. Efiku olo natango omukainhu umwe okwe shipondola okufaduka po ashike Haoseb okwe mu nhukila ndele te mu nyeke ongodi noimaliwa yaye.

Omhangu oya ti, omudo 2017 natango Haoseb okwa ya eumbo ekwete eembele ndele ta ningile ovakainhu ovo a hanga meumbo omatilifo efyo nokonima okwe va nyeka omaliko avo. Konima eshi ovakainhu va yandja omaliko avo kuHaoseb okwe va kwata onghonga aveshe, ekwete ombele ta ti oteva dipaa.

Omhangu oya hokolola tai ti omutamanekwa ou efiku olo okwa kwata po ombabyona okaana kokakadona ndele te ka kwata onghonga. Haoseb okwa anya okuitavela oibofa yomakwatonghonga ei. Okwa kolokele momhangu momafiku 28 Marisa noku li modolongo. rrouth@nepc.com.na