Auleria Wakudumo 

Omukulukadi weedula 33 okwa xulifa eshi vati a nwa oudiyo uhe shiivike apa wa dja nokwa kendabala okukufa omwenyo omonamati weedula 10 eshi emu nwifa oudiyo oo tuu oo. 

Oshiningwanima eshi osha ningilwa molukanda Okandjengedi mOshakati, sha mOlomakaya lwopo 19h00. 

Nakufya okwa tongololwa oye Opelinawa Tupombili Mwahi. Omukulunhu koshikondo shokukonaakona oimbuluma moshitukulwa shaShana, Deputy Commissioner Frederick Ndjadila okwa koleka oshiningwanima eshi. 

Ndjadila okwa holola kutya opolifi oya hanga okadini oko taka feekelwa kali oudiyo poshiningwanima. 

Otaku hokololwa Mwahi nomonamati veli tuwa komonakadona eshi a dimbuka koilonga va nangala pedu mongalashe. 

Okwa ti okwa haluka kondaka yokamwainamati ya nganga tai ifana ina mongalashe. 

Aveshe ovali va twalwa koshipangelo ashike okaana oko ashike ka xupa. 

Okaana okeli taka mono epango lopaunamiti moshipangelo shepangelo mOshakati. 

Opolifi oya holola yo kutya oya yandja okadini oko taka feekelwa ka dja oudiyo op ova ninge omakonaakono a wedwa po nokumona kutya oudiyo wa nuwa owa shike kondadalunde. 

Moshiningwanima inashifaafana naashi opolifi moshitukulwa shaShana otai konakona oshibofa Sheteyo nehanauno lomaliko epangelo omo ookalyamupombo vehe shiivike va teya nokukufa omashina mokapangelo kanini kaLuno mOndangwa. 

Okapangelo oka tewa oshivike shadja ko, efimbo inali didilikwa. 

Omukulunhukoshikondoshokukonaakona oimbuluma moshitukulwa shaShana, Deputy Commissioner Frederick Ndjadila okwa koleka oshiningwanima eshi. 

Otaku hoololwa ookalyamupombo ava va teya po ekumba lopokamuvelo kokapangelo noshilongifo shihe shiivike. 

Opolifi oya holola kutya ovafekelwa ova kufa mo eshina eli hali yandje omhepo komipepo Compressor machine nokulonga oilonga ya wedwa po moshipangelo. 

Eshina olina ongushu yoshimaliwa shi fike poN$50 000. 

Eshina inali monika natango nookalyamupombo inava tulwa moipandeko natango. -wakudumoauleria@gmail.com