Nonando oshilongo sha kala tashi lili omvula, oshiwike shika oya pitiko ya ndhiginina miitopolwa yimwepo.
Omvula ya loko moshitopolwa shaHangwena oya hanagula omalukalwa gaantu momukunda Omboloka, mwa kwatelwa osikola Nangolo Mbumba Combined School.
Omukuluntu gosikola posikola mpoka Shapwa Lazarus moonkundathana naKundana okwa ti mEtiyali lyoshiwike shika inali ya endela nawa alihe, nonando ya li ya nyanyukwa komuloka omwaanawa.
“Omvula ndjoka ya li mumwe nombepo ondhigu, oya li ya hanagula po etungo lyetu lyaanambelewa oshowo iikwamashina, mwa kwatelwa ookompiuta, osho wo iipeleki yetungo ya li ya yi nombepo,” ta hokolola ngaaka.
Ta ti, iipeleki yetungo lyomala gatano alihe, oya yi nombepo, nonado etungo ndyoka olya ningi ashike oomvula ndatu lya thikama sho kwa li lya tungwa mo2019.
“Ombepo ndjoka okwa li natango ya hanagula po omalukalwa gaalongi yetu posikola ye li yaali, moka iinima yawo ya li ya yonagulwa natango komvula,” omulongisikola ta ti ngaaka.
Ta popi ta ti otashi uvitha nayi, otwa li twa kambadhala okueta po etungo ndyoka, notwa li twa kondjo nuudhigu, ihe nena olya hanagulwa po ishewe.
“Otwa tumina etumwalaka ndika koombelewa oonene dhoshitopolwa shaHangwena notu li metegelelo lyeyamukulo,” ta ti ngaaka.
Omukuluntusikola ota indile natango moshigwana ngele ope na ngoka ta vulu okuyayambidhidha e shi ninge.
Ta ti, etungo ndyoka olyi li ashike omwaka oshoka meni omwa li mwa topolwa ashike nomambolota oshoka kapwa li oshimaliwa sha gwana.
Kansela goshikandjohololo shOkongo Lebeus Efraim Shipindo okwa ti, oonkundana dhomagumbo noosikola moshitopolwa shawo tadhi hanagulwa po kombepo kadhi shi oompe.
“Otwa lopotelwa natango omukulupe gumwe a hulitha sho a li a pile monunda yokulala, ashike shoka sha eta omundilo inashi tyseyika pampito ndjika.
Omukalimo gumwe momukunda Omboloka moshitopolwa shaHangwena naye okwa ti, ota kongo ekwatho moshigwana konima oondunda mbali megumbo lye dha hanagulwa po komvula nokombepo.
“Omvula oya loko nokuhanagula po uuthemba waanona yandje oshowo oombapila dhimwe dha li mo dha simana,” ta popi ngaaka.
Caption: Kwa za omvula…Omvula nombepo onene oya hanagulapo etungo lyosikola oshowo omagumbo moshitopolwa shaHangwena
vkaapanda@nepc.com.na