ONGWEDIVA – Ongudulwiimbo ya shivika nawa Omuwa Pungoye Choir noneudo oya pita okukala tai mwenyeke omaongalo osho yo okuimba omaimbilo oo taa xungu omwenyo nokuudifa ondjovo yomwene.
Ongudu ei oyo imwe ya shivika nawa mOngwediva hai imbi nawa nokuulika oshihopaenenwa shiwa moshiwana.
Linus Katonyala ou e li omunashipundi wongudulwiimbo ei, okwa hokolola ta ti ova tameka po ongudu ei omudo 2021.
“Otwa tameka ashike tu li vane. Okudja opo ovanhu ova enda tave tu waimine,” ta ti.
Katonyala okwa hokolola ta ti tete ova tameka ashike hava ongalele koshi yomuti mOngwediva.
‘Okudja opo twa enda hatu kongo onhele imwepo yokuongalela. Etameko kakwa li lipu ashike otwa kala tu na omukumo fiyo ongudulwiimbo yetu tai xumu komesho,” ta ti.
Okwa ti paife ongudu yavo oi na ovanhu ve dulife omi-90 hava imbi navo.
“Ohandi pandula Kalunga shaashi paife ongudu yetu oya kula. Ngeenge ova hange hatu imbi mongeleka, keshe omunhu okushe ashike a tala molwaashi hatu imbi nawa,” ta ti.
Okwa weda po ta ti ohava imbi komaongalo a yooloka moshilongo ashishe.
“Ihatu futifa ngeenge hatu ka imba, onghee eongalo keshe ola manguluka okukala letu ufana tu kaimbi kongeleka yavo,” ta ti.
Okwa yelifa ta ti ongudulwiimbo yavo oyoshiwana shaashi ota lalakanene okulonga nokuyandja omukumo kovanhu ovo va pumbwa exungomwenyo. Katonyola okwa ti ongudulwiimbo yavo oya dana onghandangala ya kula okuyambidida omaongalo tashi pitile pamukalo wokuninga oinyangadalwa.
“Otwa kwafela omaongalo a yooloka okuongela oshimaliwa. Oshinakuwanifwa shetu okuya keongalo lonhumba ndele hatu kala tu kwetele oshinyangadalwa komesho osho yo okuxwaxwameka ovanhu va yambidide,” ta ti.
Natango okwa ti ongudu yavo ohai yambidida ovanhu ve li moluhepo ile ve na oulema omo have liunganeke ndele tava ongele oshimaliwa shokuyambidida.
Okwa ti omunhu keshe okwa manguluka okukala a waimina ongudu yavo okukala tai imbi pamwe navo.
“Ohatu ongala Olomakaya keshe okudja potundi 14h00 mOngwediva,” ta ti.
Katonyola okwa ti ongudulwiimbo yavo oya etela ovanyasha omauwa nokukala ya lundulula eenghalamwenyo davo.
“Out na ovanyasha va waimina ongudulwiimbo yetu ashike okwa li va kwatwa komhepo yokunwa oingangamwifi ashike paife ova lundulula,” ta ti.
Okwa kumaida ovanyasha vakwao opo va kale tava waimine eengudulwiimbo molwaashi otashi va longo etilokalunga nokukala ovadulilki.