ONANDJOKWE – Ouministeli wouhaku otau longo nelitulemo eshi oshivike sha dja ko, koshipangelo shaNandjokwe kwa patuluka osaala yokanyofi ipe ya tungwa i na eembete 120, osho yo omashina omipepo okutalaleka ngeenge kwa pupyala.
Osaala ei oyo imwe yakula moshilongo molwaashi oya tungwa i li pamufika wopashinanena. Oya tungwa i li pongushu yoshimaliwa sheemiliona N$57. Oya patululwa pambelewa kuminista wohauka Dr Esperance Luvindao. Natango mosaala omu na eenduda omu-12 tadi ka longifwa ngeenge pe na omhumbwe yomunhu a pumbwa okulikalela monduda yaye mwene she likwatelela komatomheno onhumba. Minista okwa popya ta ti koshi yelelo lOmupresidente Netumbo Nandi-Ndaitwah ounimisteli waye owe lilongekida okulonga nondjungu okukala wa andjaneka omayakulo opaunamiti koshiwana. Okwa ti osaala ei oya fimana molwaashi otai ka kwafela ovakainhu va kale va pulumunina monhele iwa noi na oikwafifo ya wana. “Paife oomeme itava ka mona vali oixuna yokukala tava monene ounona mosaala ya finana shaashi okanyofi kape okatungwa ke na eembete da wana,” ta ti. Okwa weda ko ta ti epangelo oli na oshisho noshiwana nokukwashipaleka kutya ovanhu ove li popepi nomayakulo ouhaku ngaashi oupangelo, osho yo omayakulo ounona tava tunhilwa. Minista okwa yelifa ta ti oshipangelo shaNandjokwe oshi na ondjokonona yakula nosha dana onghandangala yakula pefimbo loita yekondjelomanguluko.
“Oshipangelo shaNandjokwe oshakula molwaashi ohashi yakula ovanaudu tava di koipangelo ya yooloka ngaashi Eenhana, Engela nOmuthiya,” ta ti.
Okwa hokolola ta ti kakwa li shipu pefimbo osaala yokanyofi tai tungwa molwaashi okwa li pa didilikwa omashongo onhumba ashike ove shi pondola okulonga noudiinini fiyo osaala ei ya pwa okutungwa. Minista okwa kumaida ovapangi neendokotola opo va yakule nawa oshiwana ngaashi naana Omupresidente Nandi-Ndaitwah a popya kutya ovanhu nava yakulwe nawa koipangelo ile meembelewa depangelo.
“Kalekei po osaala yeni ya yela nawa molwaashi oukoshoki owa fimana,” ta ti.
Oshiwana sha dja momudingonoko waNiipa okwa li sha holoka momwaalu muhapu pefimbo osaala tai patululwa omo sha hoola ehafo nolupandu eshi epangelo tali longo nelitulemo. A pandula, Secilia Simeon oye umwe womovakainhu va pulumunina kosaala yokanyofi ipe ya tungwa moshipangelo shaNandjokwe.
Okwa pandula epangelo eshi tali longo nelitulemo okuyandjaneka omayakulo ouhaku koshiwana.