Uuministeli welongo owa pititha kutya aalongwa 40,757 oya li yi inyolitha mekonaakono lyoNamibia Senior Secondary Certificate Ordinary (NSSCO) omumvogali, niizemo oyu ulike kutya 35% dhaalongwa mboka oya mono iitsa 25 oshowo yi vule po miilongwa itano.
Shika osha hala kutya aalongwa mboka oyo taya tsikile okuya kondondo 12.
Minista gwelongo Anna Nghipondoka Etiyali sho a pititha iizemo yoondondo dhahugunina okwa popi kutya aalongwa ya shanga ekonaakono lyoNSSCO ye li 14 084 oya pita sho ya mono iitsa 25 noyi vule po osho wo ye li 12 031 ya mono iitsa 20 nayamwe yi vule po miilongwa itano.
“Omwaalu nguka ogwa yi pombanda okuyeleka nomwaalu gomumvo gwa yi sho aanona yeli 10 261 ya li ye shi enditha nawa okuya kondondo ya landula ko mboka nuumvo ya shanga ekonakoono lyoNamibia Senior Secondary Certificate Advanced Subsidiary (NSSCAS),” ta fatuula ngaaka.
Nghipondoka okwa po pi wo kutya aalongwa ye li 9 835 oya li yi ishangitha ekonakoono lyomiipundi lyo-NSSCAS mo2024 mboka ya piti niitsa iiwanawa noopelesenda 89% omanga mboka ya li yi ishangitha okweendulula ye li 779 ya piti wo niitsa iiwinawa noopelesenda 88.1%.
Minista gwelongo okwa yelitha wo kutya aalongwa mboka ye shi enditha nawa otaya tambulwa kiiputudhilo yopombanda sha ikolelela kiizemo yawo yo-NSSCAS osho wo NSSCO ya tulwa kumwe.
Ta fatulula kutya okuza mondondo 11 sigo ondoondo 12 oomvula mbali dhi li kumwe sho shoka iilongwa mbyoka hayi longwa sha tsikilathana. “Otandi pandula oosikola dhepangelo ndhoka dhe shi enditha nawa nuumvo, oshowo dhoka ndatu dha lesha dhingi moshilongo mekonaakono lyo- NSSCO, yotango Rukonga Vision koKavango East , osho wo Onawa noRuacana Senior Secondary kOmusati,” ta pandula ngaaka.
Okwa pandula wo oosikola ndhingi ndatu dhopaumwene nandho dhe shi enditha nawa mekonaakono lyo-NSSCO, yotango Canisianum Roman Catholic kOmusati , Oshigambo High osho wo St. Joseph Roman Catholic High koKhomas.
Nghipondoka okwa totha mo wo iitopolwa ye shi enditha nawa ndhingi mo-NSSCO, shotango Oshikoto, Kavango West osho wo Omusati omanga Kunene nOmaheke ya hugunina miitopolwa ayihe. Mekonaakono lyo-NSSCA, oosikola dhepangelo Rukonga Vision koKavango East, Onawa Secondary kOmusati Osho wo Okatana Secondary odho dha ndhindhilikwa dhingi.
Omangaoosikoladhopaumwene dhingi mekonaakono lyo-NSSCAS odho Canisianum Roman Catholic kOmusati, Oshigambo kOshikoto oshowo St. Boniface College koKavango East.
Iitopolwa mbyoka ye shi enditha nawa mekonaakono lyo-NSSCAS Kavango West , Omusati osho wo Kavango West omanga mbyoka ye ya hugunina Hardap, Oshana oshowo//Kharas.
Nghipondoka okwa totha mo omadhina gaamboka ye shi enditha dhingi moshilongo ashihe mekonakoono lyo-NSSCO okuza kotango oyo, Jolisa Garises, Tangeniomwene Ingashipua, osho wo Trinity /Oxurus, ayehe oya zi kosikola Rukonga Vision School koKavango East.
Omanga mboka ye shi enditha nawa dhingi mekonaakono lyo- NSSCAS, okuza kotango oyo Hofni Hangula naEdwin Johannes yokosikola Onawa Secondary kOmusati , osho wo Selesite Kanyanye gokoGabriel Taapopi Secondary School mOshana.
Minista esiku ndyoka okwa li a pandula aalongwa ayehe ye shi endithanawa moondondo ndhoka dhahugunina.
“Ndika etameko ashike elongo lya pama nolya kwata miiti oko li li komeho, onkene tsikileni nokwiitula mo momambo geni, ookuume keni naya kale omambo geni, opo mu vule okulongekidha oonakuyiwa dheni osho wo yoshilongo shika,”ta kumagidha ngaaka.
Nghipondoka esiku ndyoka okwa li wo a pandula aalongi sho ya dhana onkandangala mokuyambidhidha aalongwa, ta ti naya tsikile naashoka ya kala taya ningi. Ta kumagidha kutya, mboka inaaye shi enditha nawa omumvo gwa yi ta ti elongo hapo lyahuulila mpoka, ihali pu.
Maria Ndawanapo Shikongo ngoka a li a mana ondondo ye onti- 12 okwa ti okwa nyanyukwa sho a piti niitsa 32.
“Onda kala nokulesha ndi itula mo, oshoka aakuluntu yandje mboka yaa na iiyemo yasha oya kala nokukumagidha ndje kutya ngele onda ndopa, opo tapu hulile onkalamwenyo yandje,’’ ta popi ngaaka. Ta gwedha po kutya oshoka ka li a hala okukala omulandithi guupana okwa lesha i itula mo.
Shikongo okwa kumagidha aalongwa aakwawo ye li mondondo 11 no12 ya leshe yi itula mo. –vkaapanda@nepc.com.na