New Era Newspaper

New Era Epaper
Icon Collap
...
Home / ‘Aafuthi’ yoomilliona R6 ya hala Samco a tye ko sha

‘Aafuthi’ yoomilliona R6 ya hala Samco a tye ko sha

2023-12-01  Victoria Kaapanda

‘Aafuthi’ yoomilliona R6 ya hala Samco a tye ko sha

OSHAKATI -Aalumentu yatano taya tamanekelwa eyugo lyoshimaliwa shi thike poomilliona R6 anuwa dha li mohauto yomunangeshefa Shamil Dirk gwoongeshefa dhoSamco, oya ti oya hala omuyonenwa a gandje uuyelele wi ihwa po, oshoka oyu uvite kutya oshipotha shoka ya patulilwa inashi yela sho kashi na uukwashili. Uuyelele wopolisi naamboka wompangu otau kondjithathana oshoka ompangu otayi ulike kutya oshimaliwa shoka osha li mooRand dhaSouth Africa omanga opolisi tayi ti oshali moondola dhaNamibia. 

Otaku hokololwa kutya iimaliwa mbyoka oya li ya yakwa mohauto, pegumbo lyaDirk mOngwediva. 

Ompangulilo yopevi yaMangestrata mOshakati Etitatu, oya li ya undulile oshipotha shaalumentu mboka komasiku 25 gaApilili omumvo tagu ya, omolwomakonakono inaaga pwa. 

Japhet Haikela ngoka a li a pewa ompito yeifutilemo noshimaliwa N$10 000 okwa ti, natango ke na uuyelele wothaathatha kutya oshike a li a mangwa po. “Onda ninga shike, otandi lundililwa oshinima inaandi shi ninga, okwa li handi yaka nale, ihe paife ihandi shi ningi we,” ta nyenyeta ngaaka. 

Ta ti, omwaalu ngoka gwoshimaliwa tashi popiwa sha yakwa otagu ya ngwangwaneke, oshoka ogwa yoolokathana. 

“Omwaalu gwotango sho twa mangwa, okwa li N$800 000, nokonima ogwa ninga oomillona R6,” ta popi ngaaka. Ta pula kutya omolwashike Dirk ina lopota mbala kopolisi sho a mono kutya okwa kanitha oshimaliwa ashihe shoka?” ta pula ngaaka. 

Omufekelwa gumwe natango Frans Gold Kutyowa okwa nyenyeta ta ti, oshipotha shoka okwa li sha lopotwa ashike kopolisi konima kwa li sha andjanekwa komalungula kaakwashigwana. 

“Oshiningwanima shoka anuwa osha li sha ningwa pokati ko masiku 30-31 gaMaalitsa nuumvo ihe anuwa osha ka lopotwa ashike momasiku 02 gaApilili nuumvo,” ta popi ngaaka. 

Ta pula kutya ope na ngaa omuntu ta kanitha oomiliona adhihe ndhoka ihe itaka lopotela opolisi mbala? 

Omukuluntu gwopolisi moshitopolwa shaShana Naftal Lungameni Sakaria, sho a li a pulwa ngele osha pitikwa okukala niimaliwa yi thike mpoka moshilongo, okwa ti kape na oveta tayi keelele omuntu a pungule iimaliwa yaNamibia oyindji. 

“Ihe otatu kumagidha oshigwana kaashi kale niimaliwa oyindji momagumbo okukeelela aafuthi ye ya yuge iimaliwa yawo,’’ ta kumagidha ngaaka. 

Dirk okwa li a tindi okutya ko sha koshiningwanima shika. 

Omugandji gomauyelele mombaanga onene yaNamibia Kazembire Zemburuka, okwa ti, moNamibia kamu na oveta tayi indike omuntu a kale noondola dhaNamibia odhindji megumbo nenge moongeshefa, iimaliwa mbyoka inaayi pitikwa okukaliwa nayo megumbo momuyalu omunene oyokondje owala yoshilongo. vkaapanda@ nepc.com.na 


2023-12-01  Victoria Kaapanda

Share on social media