Omupilimaminista Saara Kuugongelwa-Amadhila okwa kufa ombinga momutumba utitatu wopashiwana koLusaka shaZambia Omaandaxa.

Amadhila pefimbo a li meenghundafana pamwe noilyo yepangelo laZambia, omutumba wavo owa li tau popi kombinga youndjolowele muAfrica alishe koonono.

Okwa ti oundjolowele oo omudi wonghalamwenyo yakeshe umwe, nowa pumbwa okutulwa moilonga kukushe umwe.

Okwa twikila kutya enenedu Africa itali putuka loo li ye komesho, shapo ongeenge ovanhu tava tula oundjolowele moilonga, voo va dule yoo okumona omauyelele nomakwafo e na sha noundjowele koishiindalongo.

Okwa yelifa kutya omapangelo avali Zambia naNamibia okwa pumbwa okulongela kumwe opo a dule okueta omakwafo popepi novanhu, oo a dule okulilongela ko unene tuu ngeenge tashi ya koundjowele noukoshoki moshilongo shavo.

“Okudilila keekoola nhatu dosustainable development Namibia vati ova tokola va kufe ombinga nokuvatela mukeshe eshi tashi popile oukoshoki mouwa. Eshi vati ote shi ningi opo a dule okuamena eemwenyo davahapu, okukalamwenyo kwovanhu oshoyo eliko loshilongo,” Amadhila ta ti.

Okwa ti ova wilikwa yoo koAfrican Union agenda 2063, vatule omalandulafano peenhele, opo vati va dule oku kondeka oundjolowele wovanhu aveshe.

Okwa ti ova hala Africa li kale Africa loundjolowele. Ova pumbwa vati Africa li kale kokule nomikifi da nyaa kekako ile kukushe tuu eshi inashi nyika oundjolowele, loo Africa vati nali kale yoo Africa li na oundjolowele tau kwafa ovanhu aveshe, ndele hambinga ashike imwe.

Amadhila okwa yelifa kutya opo va dule okuhanga efikilo lokueta oundjolowele muAfrica alishe koonono, ongeenge ashike omapangelo aeshe taa longele kumwe. Okwa ti natango ova pumbwa yoo okutunga oukumwe pamwe noilongo ikwao yaAfrica voo va dule okulongela kumwe. 

Okwa popya kutya Namibia okwa kala e na ovapangi vomikunda okudja mo2012. Ovapangi ava vati ohava futwa kepangelo keshe omwedi, nova koya po1600. Opologalama yovapangi ava vati oili kumwe nomalalakano oAfrican Union osho sha etifa ovapangi va kale peemiliona mbali.