Omutoolinkundana

Iipotha iyali ikumithi yomadhipago, oya lopotwa ohela, shimwe moKavango West moka aalumentu aagundjuka ya dhipaga aavali yawo pamikalo dha faathana, thadhi nyanyaleke.

Aafekelwa ayehe mbaka oya holoka mompangulilo yaMangestalata gwaRundu moka ya tindilwa eifutilomo.
Oshiningwanima shotango osho shoka omukiintu a dhipagwa komwanamati gwomimvo 25.

Otaku hokololwa omulumentu nguka a dhenge yina komutse netemo, shoka sha eta opo omukiintu nguka a se pokathimbo mpoka. Oshiningwanima shika osha ningilwa moshitoplwa shaKavango West momukunda Ekuli moshikandjohogololo shaTondoro mOsoondaha.

Olopota yopolisi ndjoka ya piti ohela otayi ulike kutya oshiningwanima shika osha ningwa komatango goOsoondana. Nakusa oye Likuwa Anastasia Tjangano (53).
Oshingingwanima oshikwao osha ningwa mEtitato momukunda Sinono moshikandjohogololo Musese moka okamati komimvo 18 ka dhenge he okusa. Otaku hokololwa okamatyona haka ka dhenge he naku ka vala, omunamimvo 34.  Mbaka anuwa oya li taya nyenyeta sho okamatyona ka kutha oshiti nokuthekagula he. Nakusa oye Paulus Sihova Cimu.

Moshipotha oshikwao tashi kumitha inaashi faathana naambyoka iyali, omukiintu gumwe okwa itsuwa a imangeleka pehala tali ithanwa Camp Five mOtjiwarongo.

Sigo oompaka nakusa nguka ina tongololwa. Omakonaakono gopolisi otaga tsikile miipotha ayihe itatu.

Aanona ya ‘li oshimwenyo’ nohauto ya yakwa

Opolisi yaNamibia oya lopotelwa oshipotha moka uumatyona uwali, kamwe oke na omimvo hetatu nokakwao o13 we ende osikola pomunkulo noku ka yaka po ohauto yaantu. Oshiningwanima shika osha ningilwa momundhingonoko gwaKaribib.

Okamatyona hoka ke na omimvo 13 oka li ka patelwa mo nokupatululilwa oshipotha shuufuthi woshihauto. Opolisi opo ya tegelela omayele okuza kaaniilonga aahungimwenyo yepangelo opo ku ningwe etokolo kutya okamayona haka okashona ko ota ka ningilwa shike.

Ashike awuhe owa ethiwa manga nokugandjwa momake gaakuluntu yawo.

Otaku hokololwa uumatyona mbuka wa li wa tanauka ko kosikola mEtitano e tawu yi kofaalama yedhina Farm Kaliombo hoka wa kala ethimbo tawu dhana.

Konima yethimbo owa yaka po ohauto yaantu pofaalama mpoka e tawu ka ‘lyanga’ nookuume kawo moKaribib moka.

Owa li wa monika kaakwashigwana yamwe mboka ya lopotele opolisi. Shoka sha eta opo wu mangwe po.

Ohauto ndjoka yi na ongushu yo180 000 anuwa oya adhika ya ehamekwa mombaambala nomomupolo.