ONGWEDIVA - Ominista youhaku noukalinawa omundohotola Kalumbi Shangula okwa ti epangelo ola hala okutula onghalo yaavo ve li ko16 monghalo i li xwepo.

Shangula eshi okwe shi popya pefimbo a li ta nangeke okomitiye yosaala yovanhu ve na ounghundi wopamadilaadilo.  

Minista okwa ti oshinakuwanifa shokomitie okutalela po ovanaudu oikando ya fika puivali momwedi. Okwa tumbula yoo kutya natango ove na oshinakuwanifa shokutofa mo omaudjuu aeshe tae linyenge mosaala omo nosho yo okupopya novanaudu, okuva udifa nawa apa tava dulu shaashi vahapu ohava kala va pumbwa exungomwenyo.

Shangula okwa weda po ta ti epangelo otali kufa ombinga mokudeula ovanhu va yooloka opo va dule okuvatela ovanaudu ve li ko16 shaashi ova pumbwa omakwafo a yooloka.

“Epangelo otali kendabala yoo okuyandja oilongifo ya yooloka ngeenge tashi ya pokulonga novanaudu voludi eli ngaashi exungomwenyo naikwao ya wedwa po opo va dule okukala ve li monghalo i li xwepo,” Shangula ta tumbula.

Shangula okwa tumbula yoo kutya oipangelo ihapu moNamibia kai na eesaala dovanhu ava ve na ounghundi wopamadiladilo noi na omhumbwe yakula. “Ondi shi shi kutya osaala yakula yo-16 oi li moshipangelo shaCentral moWindhoek ashike nayo oi li monghalo tai shongola noya pumbwa evatelo,” ta ti.

Minista okwa ti yoo ngeenge tashi ya poshipangelo shaShakati natango osha pumbwa ekwafo lomeendelelo shaashi osaala ei i li mo ohai tambula ashike ovanaudu ve li 60, ovo paemhito dihapu ihava kala va wana mo mosaala.