Epangelo ola ingida kutya oshitukulwa shErongo noshaKhomas otai pate filufilu, hano itamu diwa mo itamu iwa okudja mokati koufiku wEtitano lomafiku 27 Maalitsa. 

Ovanailonga vepangelo noomahangano a nyama kepangelo moitukulwa omo ova kumaidwa yoo opo va longe okudilila komaumbo. 

Komatango onghela Omupresidente Hage Geingob okwa shivifa vali kutya omalweendo okuya koilongo aishe mounyuni nao inaa pitikwa vali okudja moNamibia. Ei oimwe yomwaayo ya shivifwa onghela komupresidente nominista youhaku Kalumbi Shangula onga oshitukulwa shekeelelo letandavelo locoronavirus. 

Namibia oku na paife ovanhu vahamano va kwatwa koCovid-19. Movanhu omo mu na omunhu umwe a kwatelwa kombuto moshilongo shaashi vati omunaudu oo ke na nande ondjokonona yokuya kondje yoshilongo, omanga vakwao aveshe ova dja naye kondje yoshilongo ngaashi omulumenhu oo a dja koLondon, nomunafikola oo a diilila koSouth Africa.