Opolifi oya lopotelwa oiningwanima yomateo omaumbo, eendingosho oshoyo oulunga woinima ya yooloka ya fika po14 mexulilo shivike.
Imwe yomoiningwanima oya holola omaliko ena ongushu yoN$20 900 ya lopotwa ya vakwa meumbo li li moWalvis Bay moEast Meersig mexuliloshivike.
Ovafeekelwa vati ova kendabala okuyeulula ekende leumbo, ndele tava pitifa eenyala davo da yuka pomuvelo, fiyo tava yeulula po, opo va dule okuvaka.
Olomakaya omukalimo umwe womEenhana moshitukulwa shaHangwena, womomapandavanda aJansen okwa lopotwa a vakwa oinima yaye meumbo i na ongushu yoN$15 148.
Ovafekelwa vati ova longifa oilongifo ihe shiivike okuteya omuvelo woshipilangi wokokombifa, opo va dule okuvaka mo oinima yongushu aishe oyo.
Omukalimo umwe womoWindhoek moshitukulwa shaKhomas natango okwa lopotwa a nyekwa oshihauto shaye poGoreangab pefimbo lokomatango.
Omufekelwa vati okwa longifa oshilongifo shihe shiivike okuteya otuwa yoshihakanwa, opo a dule oku i shinga po.
Otuwa vati oi na ongushu yoN$45 000.
Opilifi natango oya lopotelwa omulumenhu weedula 37 a ponokelwa keembudi meumbo moHochland Park, moshitukulwa shaKhomas. Ovafekelwa vati ova ponokela meumbo lomufeekelwa keenghono ndele tava kufa mo oinima i na ongushu N$25 000.
Oiningwanima aishe oya ningwa pefimbo lokomatango yoo imwe okonguloshi. Omaliko eashe a vakwa po inaa monika, voo novafekelwa navo inava monika fiyo opapa.
Ovatonateli vomaliko, omukainhu nomulumenhu mEenhana natango ova lopotwa va ponokelwa keembudi manga va li tava tonatele omaliko ofitola. Oshiningwanima osha ningilwa po S.T.E Supermarket momapandavanda a Tulipamwe.
Umwe womavafekelwa vati okwa ponokela omutonateli wamaliko ou womulumenhu ndele te mu denge nodopi komutwe oikando ihapu, ndele vati te mu kufa ondjebo yaye.
Vati ovafekelwa eshi va kufa omutonateli womaliko ondjebo ova twikila nokutatula omakende ofitola ndele tava ponokele mo. Konima eshi va mana vati ova ya mokabetting ke li popepi, ndele tava kufa mo oipatululo yomashina ya fika pomuwoi, tava kufamo yoo omaliwa ya fika poN$ 3 600. Opolifi vati oya kwata po omufekelwa umwe weedula 30, ashike omakonaakono natango oku li metifa.
taimihaihambo2000@gmail.com