Omhumbwe yomeva keehambo di li momukunda Olumpengwa moshitukulwa shaMusati shilindi manga, eshi ombelewa youkaleliposhilongo yoEuropean Union ye va tulila ko omboola yomeva. Omboola oya patululwa pambelewa kuminista wounamapya, omeva, edu, nomakuti Etitatu.
Okwa didilikwa ovakwashiwana hava di momukunda Olumpengwa noshoyo omikunda dopomudingonoko va kala tava dengwa kenota molwaashi kakwa li ve na omeva.
Oimuna yavo ohai fi koshikukuta omanga oovene veehambo vamwe ohava ningi eenghendabala dokuetela oimuna yavo omeva. Pefimbo ta patulula omboola pambelewa minista wounamapya, omeva, edu nomakuti, Calle Schlettwein okwa pandula ombelewa yomukaleliposhilongo waEuropean Union molwokushakaneka epangelo ondjilakati.
Schlettwein okwa ti ouministeli wavo owa didilika ovakwashiwana tava teya po eemboola domeva omanga vamwe ohava vake po ominino domeva. Onghee okwa kumaida ovakwashiwana opo shi xulife po okuteyaula po eemboola domeva. “Ovakwashiwana nave liunganeka meengudu dokutonatela eemboola davo. Epengelo itali ka longulula nande eemboola domeva da tewa po kovakwashiwana molwaashi ope na omikunda dihapu da pumbwa omeva. Onghee ohashi pula oshimaliwa opo omboola i kale ya tungwa,” ta ti.
Okwa weda po ta ti omunhu keshe ta ka monika tavake po ominino deemboola ile ta teya po oilongifo na lopotwe opo a kale a katukilwa onghatu yopaveta.
Minista okwa ti omboola otai ka eta elunduluko kovanahambo molwaashi paife oimuna yavo itai ka fya vali kenota. “Ounamapya owa fimana molwaashi ohau eta po eemhito doilonga nokukondjifa ondjala moshilongo,” ta ti.
Moshipopiwa shaye omunambelewa a dja kombelewa yomukaleliposhilongo waEuropean Union, Gosia Lachut okwa okwa ti omeva okwa fimana kovanhu noimuna.
Okwa ti otashi tu omukumo ovanafaalama vokutwikila nokumuna oimuna yavo ngeenge ve na omeva.
“Ohatu lalakanene okuyambidida oshikondo shounamapya unene tuu ovanafaalama ve li momhumbwe yomeva monooli,” ta ti. Omunashipundi wovanafaalama Erickson Kamati okwa ti ova kala va taalela eshongo lomeva okunwefa oimuna yavo.
“Otwa pandula eshi paife twa mona omboola yomeva molwaashi paife ohatu ka kala hatu muna oimuna yetu noupu,” Kamati ta popi. fhamalwa@nepc.com.na