Ouministeli weemina noikwanghono owa yandja ouyelele kutya ondado yomahooli otai shuna pedu momwedi Desemba.
Ouministeli owa yelifa kutya ondado yomahooli odisela 50ppm oshoyo odisela 10ppm otai ka shuna pedu neesenda N$130 koliitela, eendado edi oda kwatela mo yoo omahooli opetolola.
KoWalvis Bay ondado yomahooli opetolola oi na N$21.58 koliitela omanga odisela 50ppm i li poN$21.85 koliitela, yoo odisela 10ppm i li poN$22.05.
Omukulunhu wouministeli Bryan Eiseb okwa ti omahooli paife eshi a ninga mahapu nokwa wanena nawa, osha etifa kondado kuxumwe.
Omishangwa oda yelifa kutya ondado yomahooli opetolola inai dindwa muNovemba oya li peeUSD96.650 kondoloma, okuyelekanifa naKotoba omo ya li peeUSD97.616.
Omahooli o50ppm muNovemba okwa li peeUSD105.459 kondoloma oku yelekanifa naOkotoba omu yali peeUSD117.352 kondoloma kexulilo laKotoba.
Omahooli odisela 10ppm muNovemba okwa li e li pee USD106.088 kondoloma, okuyelekanifa naKotoba omo a li e na ee-USD118.154 kondoloma.
“Ngeenge otwa valula nawa, omivalu oda yelifa kutya omahooli odisela 50ppm okwa shuna pedu neeUSD12 kondoloma ile neepelesenda 10.1.
Omahooli odisela 10ppm okwa lopotwa nayo a shuna pedu neeUSD12 kondoloma ile tutye neepelesenda 10.1.
Omahooli opetolola okwa shuna pedu noUSD1 shoo ngeenge sha i meepelesenda oshi li po1.02,” Eiseb ta ti.
Okwa twikila kutya okudja mefiku 01 fiyo 24 Novemba odola yaNamibia oya ngushupala neepelesenda nhatu ko-USD okuyelekanifa naKotoba.