ONGWEDIVA- Opolifi moshitukulwa shaShana otai konaakona oshibofa shoumbudi nenyonauno lomaliko omo ookalyamupombo va vaka eedalate dongopolo odo hadi longifwa momakwatafano opaengodi.

Otaku hokololwa eembudi da vaka eedalate odo da ya ko NBC nokombwelewa yopashitukulwa shaShana (Oshana Regional Council).

Enyonauno eli ola eta NBC Kati FM a ha dule oku pitifa omawi momhepo Etitatu alishe fiyo ongula yEtine. Eengodi odo odi li koshi yehangano laTelecom Namibia. 

Onambelewa omukulunhu woTelecom mOshakati Elizabeth Jonas okwa ti, eembudi ode li vakela noku patulula okandama kamwe omo mwapita eengodi domakwatafano ndele tave ditete pomakati. 

Jonas ta ti ovafeekelwa ovateta nokuvaka eengodi dongopolo di li pongushu yoN$4000. Jonas okwa tumbula kutya oshinigwanima eshi osha kwata moshipala oilonga yokouministeli wehongo opamwe nOshana Regional Council shaashi kavali ve na nghee ve na oku kwata fana neecustoma davo. 

 “Otashi ke tu pula mutu oule woshivike ashishe opo tu dule oku nyumuna po omakwatafano oo noku shuna oinima aishe peenhele,” Jonas ta ti. Okwa weda po yoo kutya otashi dulika Oshana Regional Council oshoyo ouministeli wehongo vaha ka yandje omakwafo ngaashi shito molwa enyonauno olo.

Jonas okwa weda po yoo kutya onghalo ili ngaha oya patela ovanhu vavo pondje shaashi itava dulu vali okuyandja omakwafo oo taa dulu okuyelula po ongeshefa yavo. “Ohatu kanifa shihapu moule wefimbo eli hatu kendabala oku wapeka onghalo,” Jason ta ti.

Opolifi moshitukulwa shaShana onghela oyalopota kutya, onghela Telecom okwa yandja ekwafo lopokafimbo kuNBC omanga oinima tai shuna kolutenda.Omupopiliko wopolifi moshitukulwa shaShana Thomas Aiyambo okwa popya kutya eembudi deengodi domakwatafano ohadi ka landifa eengodi dongopolo keengalashe odo hadi lande oitenda ikulu shaashi odi na ondjudo nohadi landwa koshimaliwa imaliwa ihapu pku yelekanifa noitenda ikwao. “Otwa kunghilila oovene vee veengeshefa odo vakale ohanda nokulopota keshe tuu ou taka eta eengodi dongopolo pomalandifilo avo,” Aiyambo ta ti.