Oshikondo shomavyulonghalo needolongo moNamibia, shCorrection Service noshipupudilo shaUnam otava ka longela kumwe okulonga eembuto doikunomwa ya yooloka.

Eembuto otadi longifwa okukunwa komavyulonghalo a yooloka moshilongo omanga dimwe otadi landifwa po.

NCS naUnam okwa li va ninga omutumba Etivali kevyulonghalo ledina Evaristus Shikongo moTsumeb, omo va kundafana nghene tava ka kala ve na oukaume wokulongela kumwe.

Moshipopiwa shaye komufala woshikondo shomavyulonghalo moNamibia Commissioner-General Raphael Hamunyela okwa ti ova kala va taalela eshongo linene lokulanda eembuto kondje yoshilongo.

Hamunyela okwa weda po ta ti itava ka landa vali eembuto kondje yoshilongo molwaashi paife otava ka longa eembuto davo vene.

“Eembuto oda ninga ondilo paife, onghee hatu longifa oshimaliwa shihapu ngeenge hatu lande eembuto kondje yoshilongo,” Hamunyela ta ti.

Hamunyela okwa ti NCS oku na oikunino younamapya ine komandiki omavyulonghalo ngaashi Divindu, Olunho, Hardap noEvaristus Shikongo nohava longo oikulya yavo vene.

“Moikunino otamu kala mu na oikunomwa ye likalekelwa nelalakano opo i kale tai di eembuto omanga ombinga ikwao itai ka kala oikunonwa oyo itai ka dja eembuto,” ta ti.

Okwa pandula UNAM eshi ta ka longela kumwe noshikondo sheedolongo mokutopolelafana ounongo wokulonga eembuto.

Hamunyela okwa ti ovanadolongo otava ka mona omhito iwa yokumona ounongo wokulonga eembuto molwaashi otava ka pewa omadeulo kovanambelewa va-UNAM.

Moshipopiwa shaye omukulunhu woshipupudilo sha-UNAM noku li omupedupresidente Nangolo Mbumba okwa ti ounamapya owa fimana molwaashi ohau dulu okuyambula po eliko loshilongo noshoyo okulwifa ondjala noluhepo.

Onghee okwa ti UNAM ota ka yambidida oikunino komavyulunghalo ayeshe moshilongo opo a dule okulonga oikulya ya wana noshoyo eembuto.

Mbumba okwa ti UNAM ota ka yandja omadeulo kovanadolongo noshoyo okuninga omapekapeko kombinga nghene eembuto tadi longwa.

fhamalwa@nepc.com.na