• Ota tekula ounona ve dule po60

• Vaheyali ove li koiputudilo yopombada

• Vaheyali ohava longo

• Vahamano ova tunga omaumbo

OMHEDI - Okudja nghee ohamba yaUkwanyama m e e k u l u Ma r t h a Mwadinomho yaKristian Nelumbu a ningile eshivifo kutya keshe ou e na okaana ine ka hala, ne ka twale kouhamba, kapa li naanaa pa udika kutya ovo va nuninwa etumwalaka olo, ove li tambula ko ngahelipi.

Ashike nena eshi hatu popi ngaha, mombala yaUkwanyama omu na ounona ve dule po60. Ovatekulwa okwa li ve dule po opo, ashike vamwe ova dja mo va ka dika omaumbo avo. Nelumbu okwa ti vahapu vomounona okwe va etelwa va li moluhepo, vamwe ova ningilwa nominyonena dopaixulo, eefiye, naava va kupulwashi kovadali vavo.

Umwe womwaava va tekulwa kOhamba, Albertina Nehemia okwa ti pohamba okwe ya po e li mondodo onhinhano ashike paife oha longo, noku na eumbo laye kumwe ku lili.

“Pumeekulu onde ya po lela ndimushona nda etwa po kovadali vange shaashi Shipanga okwa li ta nyenge Nangolo kombinga yoyuuyemo” Nehemia ta ti. Okwa ti konima eshi a mana elihongo laye okwa ka mona oilonga konhele i li kokule nombala oko e na eumbo laye paife. Ta ti eshi okwe shi ninga, opo a dule yoo okuyandja omhito kounona vashona ovo ngaashi naanaa ye eedula dinya, opo tave ya mo mombala notava pumbwa efiloshisho.

“Ashike nande ndi na olukalwa lwange, kouhamba kOmhedi oko ashike keumbo letu fiyo onena. Ohandi kendabala alushe okutumina meekulu oshimaliwa ngeenge nda toola opo a dule okulikwafa pamwe novatekulu ava a idilila meumbo,” Nehemia ta ti. Martha Sheehama omunamido 28 okwa ti mouhamba okwe ya mo e na odula imwe.

Nena Sheehama okakadona ke li koUnam take lihongele oulongi. Okwa ti okukala kwaye mouhamba okwa ikila mo lela hamu kala mu yadi shaashi nghee mu li ohamu etwa ounona vahapu, mwa kwatelwa eehanana doovene, novakulupe vehe na apa tava di. Ta ti meekulu Mwadinomho oku na omaumbo avali, limwe okouhamba wokOmhedi, neumbo laye lopaumwene kOkambebe, ta ti momaumbo eashe avali omuyadi ounona tava tekulwa.

“Kape na naana kutya ope na ngeno ehangano ile ekwafo lela hali di kepangelo okulandela ounona ovo ominambo ile omashini, oimaliwa aishe ohai di ashike mondjato yameekulu. Ounona ngeenge ve ya mo ohatu va pewa fye ava twa hangika mo twa kula taku tiwa ovetu. Keshe umwe oho pewa nee ohanana yoye, to kala ho i file oshisho shoku i kosha, oku i pa ilye, oku i twala koshipangelo oshoyo okukala to lombwele meekulu ngeenge ominambo nomashini a pwa po, yee meekulu ta ningi omalandulafano opo i kale ya landelwa oikulya,” Sheehama ta ti. Okwa twikila kutya ngeenge va mono ekwafo komahangano ongeenge ashike omunhu e ya po ile ehangano lonhumba le ya okutalela po Ohamba, konima shaa va mono ounona, voo tava pula eshi he va pe opo nee hava  dulu vati okuyandja nande oshimaliwa ile oikulya.

Okwa yelifa kutya ava ve li koiputudilo aveshe ove li meenhele dokuhiila hadi futwa keshe komwedi kumeekulu opamwe naashi tava lile mo oshoyo oidjalomwa yavo. Efimbo limwe vati nande ove na eshi va hala okupula ile va pumbwa ohava nyengwa ashike, molwonghenda vati ve nine inakulu, shaashi ovanhu vahapu va idililwa. Ovo va hala okunawapeka oitwa yavo, ohamba vati ohai va tumu ve ke shi ningile koiputudilo yopaumwene.

“Ohandi pandula meekulu shaashi ovalumenhu aveshe konyala ava va hombolela meumbo letu ova pewa omapya popepi nouhamba, opo vaha kale kolule nameekulu, voo va dule yoo oku mu kwafa apa tava dulu. Ohandi indile omahangano a twikile nokukwafa aa hae shi ningi shito, oshoyo keshe ou ta dulu natango e liyambe mokukwafela oshiwana shaNamibia pamwe nameekulu,”

Sheehama ta ti.