Opolifi yaNamibia exuliloshivike oya lopotelwa oibofa yeteyo lomaumbo itano, mwa kwatelwa omunyeka womaliko kwa homatiwa, oyo ya holoka po. 

Opolifi oya lopota ovafekelwa vane va kwatwa po konima eshi va teta odalate ndele tave livakele moDas Brucken Hus Guest House moshilandopangelo. Ovafekelwa vati ova pitila mekende mokuya monhele omo, tava ngungumanifa ongudu yovanhu ovo va hangika mo noku va ulika eendjebo ndele tave va nyeke oinima i na ongushu yoN$25 400. Kape na omufekelwa a kwatwa po moshinima eshi. 

Natango opolifi oya lopotelwa eteyo leumbo moKatutura, omo ovafekelwa va longifa oshipatululo shihe shiivike okuteya onhele oyo. Ovafekelwa vati ova vaka oinima i na ongushu N$20 000. Natango moKatutura omwa tewa eumbo omo ovafekelwa va vaka oinima i na ongushu yoN$10 020. Natango kape na ovafekelwa va mangwa, vali oinima inai monika. 

Opolifi oya lopota omufekelwa koKatima Mulilo e livakela meumbo lovanhu ndele ta vake oinima i na ongushu yoN$29 800. Ina pa kwatwa omunhu. 

Okwa hokololwa yoo omufekelwa weedula 28 a teya okatenda kovanhu, pefimbo mwene a li eke lihafifa kOkapika Campsite. Omufekelwa mokatenda okwa vaka mo oinima i na ongushu yoN$3 389. Omufekelwa okwa tulwa moipandeko nokwateelelwa a holoke momhangu. 

Okwa lopotwa yoo omufekelwa umwe a nyeka omukainhu ongodi yopeke, konima eshi e mu ningila omatilifo nombele. Kakele kongodi okwa nyekwa yoo ondjato yoikutu. Oinima aishe kumwe oi na ongushu yoN$8 050. Kofaalama yedina Wilheben moshitukulwa shaDistrict okwa dipawa eedi di li 15, adishe kumwe di na ongushu yoN$ 30 000. Ombelela yeedi oya monika, ashike kape na omufekelwa a kwatwa po. Ovafekwelwa vavali natango vati ova vaka opomba moDordabis i na ongushu yeedola N$ 30 000-00. Vavali natango ova vaka oikombo momukunda Omeege moshitukulwa shaShana yongushu yayo i li poN$3 000. Omakonaakono opolifi moibofa aishe otaa pula komesho.