Omunamido 29 Paula Mwandingi okwa hokolola kutya yee okwe lihongela oBusiness Management eedula da dja ko koSouth Africa, ashike molweemhito doilonga da pumba ina mona omhito yoilonga vati.
Okwa twikila kutya, onghalo yokuhe na iilonga oye mu fininika opo e ke lishangife koshiputudilo sha-IUM opo eke lihongele ouhongifikola.
“Pefimbo handi lihongele ouhongifikola, onda kala handi longo po ounona vamwe va li tava hiila meumbo letu. Eshi osha weda ko yoo kounongo wange wokuhonga osho yo omukumo wakula kutya mboli eifano ohandi li dulu lela,” Mwandingi ta yelifa. Eshi omusamane waye vati a mona te lihongo noudiinini yee ke na oilonga, nonande a mana okulihongela ouhongifikola, okwe li manga epaya a ongelele omukulukadi waye oimaliwa opo e mu tungile eefikola mbali imwe omOngwediva ikwawo omoWindhoek odo tadi patuluka modula tai ya.
Mwandingi okwa ti omushamane waye eefikola okwe di luka Madam Victoria Private School.
Shacks Mwandingi omusamane waPaula okwa tumbula kutya okwa li hashi mu vele neenghono okutala omukulakadi waye e li pedu. Okwa twikila kutya natango vati okwa li hashi kala shidjuu kuye neenghono okutala ovanafikola vahapu va dja koiputudilo yayooloka ve li momaumbo vehe na oilonga. “Ei omhito yoo iwa natango okuyandja oilonga kwaavo ve li moshikondo shehongo va kalela omapandavanda voo vamwe ve li momaumbo va mwena,” Shacks ta tumbula. Okwa twikila kutya ofikola ooti ka kala youpaumwene notai ka wila koshi yedina Madam Victoria Private School.
Ofikola oya tumbulwa ya tambulwa ko kepangelo laNamibia, notamu ka kala mu na oshikondo shokufila ounona vaniingholi oshisho, oshikunino oshoyo ondodo yotete.
Ofikola natango vati otai ka yandja yoo eetundi dokomatango kondodo yotete fiyo 12. Mwandingi okwa tumbula kutya ota kunghilile ovakalimo vomoshitukulwa shaShana oshoyo Khomas va ka tambulife ounona vavo manga pepi. Okwa tumbula yoo kutya natango ota indile ava ve lihongela oulongi ve li momaumbo vehe na oilonga va yadeke. Pexulilo okwa ti ovanafikola veetundi dokomatango otava kala hava futu oN$350 koshilongwa shimwe, omanga ounona vashona ava tava kala have ya kefiloshisho pamwe naava ve li moshikunino oshoyo ondodo yotete itava kala hava futu N$1 050 komwedi.
“Ohandi dulu yoo okuminka ko0813783801, shi na sha nomapulo,” ta tumbula.