ENGELA - Oomeme ve li momateelelo kewalanda lokEngela otava ti onghalo yomonhele yavo oya naipala shaashi kave na omeva. 

Ewalanda ola ninga efiku li li monghalo i lilifa ashike okwa li ngoo tai nuwa omeva shaashi omwa li mu na omeva. Paife vati onghalo oya hanya shaashi ola ninga eemwedi nhano paife lihe na omeva.

Omutonateli nomukwateli komesho wewalanda Lydia Iimbili okwa popya ta ti omeva okwa tetwa ko shaashi a pita noimaliwa ihapu noku li meendjo dihapu fiyo onena.

Okwa ti ovanhu ohava futu N$14 koshivike noimaliwa ohe i twala koshipangelo shaNgela, ashike vati ke shi lela kutya ohai ka longifwa shike.

Iimbili okwa twikila kutya enaipalo longhalo yewalanda hamolwa ashike epato lomeva ashike oundjuwo navo ova pata, novakainhu ve li momateelelo ohava longifa oluxwa okulivatela.

Oulikoshelo mewalanda ove li mo va pata, novakainhu ava ohave likoshele ashike pongalangala ashike pondjila hapa ende ovanhu omutenya noufiku.

“Ohatu kala lela hatu ulwa omalaka mai kovashingi voihauto ngeenge hatu likoshele poluhauela eshi tava ende po, voo tave tu minikile neetuwa, ashike nafye katu na nghee shaashi halo ehalo letu,” omukainhu umwe ta ti. 

“Natango oshi li efano lii nola puka kounona vashona hava ende apa hatu likoshele, nohashi kala lela she tu kuma keemwenyo,” mukwao ta weda po.

Omolwonghalo yokuhe na omeva, ovakainhu ava ohava ka teka kokapomba ke li koshipangelo. 

Omukainhu umwe okwa yelifa kutya kashipu okukala we lihumbata ndele, keshe fiku ota kikimba omandini lomeva okuli lkosha nokuteleka. Okwa ti ohashi dulu okukala sha nyikila oshiponga ina yokaana oshoyo okaana aka ke li medimo.  

Iimbili okwa ti natango ewalanda kali na eenete deemwe, oshoyo omalapi  opomakende.

“Omakende amwe okwa tatuka, opwa tulwa nee omapakete, poo puamwe ope li ashike ngahenya, omanga aa inaa tatauka kae na nande olo elapi lavikila po. Ngeenge kwa toko keshe umwe oku va wete eshi ve li meenduda tave linyenge nakeshe eshi tava ningi,” Iimbili ta ti.

Okwa twikila kutya natango etala ohali yada okumana. Eshi sha etifa ovanhu vamwe va ka dike outenda monhele ei ya nuninwa ngeno okukala hai telekekwa.