OSHIKANGO- Oshikondo shouhaku moshitukulwa shaHangwena oshe ya po nomukalo mupe wokupa oipangelo yepangelo moshitukulwa omapapa ngeenge ya longa nawa.
Oshiindingili eshi shomapapa oshaningwa lwotete oshivike shadja ko kOshikango, omo oshipangelo shaKongo sha ya nepapa mokuyakula nawa novanaudu oshoyo mokuyandja omakwafo omeendelelo.
Oshipangelo shaNgela nasho osha pewa yoo epapa loukoshoki moshitukulwa ashishe.
Pefimbo leyandjo lomapapa, omukulunhu wounamiti Jonh Hango okwa tumbula kutya, elalakano loshivilo okutwa ovapangi omukumo opo ve li pakemo moilonga yavo, shaashi vahapu ova kanifa ondjelo nondjungu youpangi.
Okwa twikila yoo kutya elalakano loshitufi sholudi eli, oku eta omafiyafano moipangelo unene ngeenge tashi ya keyandjo lomakwafo ayooloka. Okwa ti yoo okwa hala ovapangi va longe noudiinini mokuyandja efano li wa koipangelo moshiwana.
“Oipangelo yetu otai popiwa nai moshiwana, unene tuu ngeenge tashiya poku yandja omayakulo. Ovapangi otava ngwanyauna ovanaudu, vahapu ovena ondede yokuyandja omakwafo apumbiwa, voo vamwe kave na ko nasha. Vaholike longeni mushi kutya omwa humbata eemwenyo dovanhu vaKalunga komapepe eni. Longeni onga ovanhu vena eifano ve li anena, ndele ina mul onga mwa fa ovanhu ve li meifano veli findilwa,” Hango ta ti.
Okwa tumbula kutya eelopota doludi olo, odo deva undula opo veuye kumwe pamwe novapombada moshikondo shouhaku va ete po ediladilo lokuyandja omapapa apa ovanhu va ninga nawa, voo va yelife yoo eelopota edi hava mono mombelewa yavo.
“Otwa teelela ovapangi va lundule pokuyandja omayakulo, opo ashike oshiwana shokomongula tashi i komesho,” Hango ta ti.
Ngoloneya woshitukulwa Walde Ndevashiya oo naye a li poshiindingili okwa tumbula kutya nonande oipangelo yalopotwa ina omakawafo taa shongola, ovanashilonga voundjolowele inava sholola.
Okwa twikila kutya oshitukulwa oshi na omhumbwe yakula yoipangelo yoku tambulila ovanhu ve li meenghelo dii.
“Ovanaudu vetu vahapu ohava tumwa ashike koitukulwa yayookola ngaashi kOshakati shaashi moshitukulwa omuna ashike oipangelo ishona. Eshi natango ohashi kala oupyakaidi wakula molwa oinano ile oyeendifo ina oku tondoko opo ika fikife omunhu eli omonghalo ita inuwa omeva. Natango epangelo oha li haluka yoo tali, longifa oimaliwa ihapu momahooli shaashi oinano oile,” Ndevashiya.
– taimihaihambo2000@gmail.com