ONGWEDIVA - Kansela woshikandjohoololo shaKatyali moshitukulwa shaShana Joseph Mupetami okwa ti oshikandjohoololo shaye osha taalela oshikukuta shamemememe, noshi na omhito yakula shi hepeke ovanhu noimuna. 

Mupetameni okwa popya kutya oshitukulwa oshe lihanena oimuna ya dja koitukulwa ya yooloka unene tuu Ohangwena nOshikoto tai kongo oulifilo muwa. Okwa popya yoo kutya oimuna ihapu ya dja koikandjohoololo imwe, oya lamba omeva efundja oo e lihanena kombuwa ashike nande ongaho kaku na omwiidi. 

Kansela okwa ti, oulifilo otau shongola. “Ovanhu vahapu ova enda oinano ile va dja keenhele dokomakule va lamba oulifilo oshoyo omeva oimuna yavo,” Mupetami ta tumbula. Okwa weda po yoo kutya ovanhu navo vene otava fi ondjala nova lulilwa. 

Okwa popya yoo kutya vahapu momudingonoko ova tila molwoshikukuta eshi, nova teka omikumo shaashi kave shi kutya otave shi taalele ngahelipi. Mupetami okwa ti yee ota tu ashike ovanhu vomoshikandjohoololo shaye omukumo vaha sholole. 

Okwa weda po yoo kutya ova ninga omaindilo kepangelo e na sha neyambidido loikulya yoimuna oshoyo ovanhu. Natango ota indile yoo ovalandifi voikulya yeengobe ve lilongekide okukala ve na oikulya yoimuna ya wana meefitola davo shaashi ediladilo eli li li po paife okuya ashike mofitola. Ota indile yoo ovanhu vomoshikandjahoololo va kale ve lilongekida okukala ve na eendjato da pama shaashi kape na vali omhito imwe.