Taimi Haihambo

Etokolo lomhangu moshibofa shekwatonghonga omo ovanafikola kosekundo yaDr Abraham Iyambo, vati va kwata omunafikola mukwao keenghono, okwa teelelwa li ningwe nena.

Ovafekelwa ovo vatatu, vati ova kwata keenghono okakadona komido 15, ve ka hangakenena moluumbo lofikola.

Eshi va holoka momhanghu yopedu yEenhana onghela, oumatyona ava aveshe ove lipopila.

Umwe womuvo okwa tumbula kutya voo kava li ve na ekwatafano lopaihole nanakuningwa oshihakanwa.

Oshihakanwa vati osho she va pula ngeenge otava dulu okuya nasho moixulo aveshe vatatu.

 “Onde mu pula kutya eshi te tu pula ngaho ote tu dulu ngoo atushe, ndele ta nyamukula kutya ota dulu,”mukwao ta hokolola.

Konima e shi a tumbula kutya ota dulu, vati ovafekelwa vatatu ova pula komesho. Umwe womovafekelwa okwa hokolola yoo kutya voo havo votete tava nangala nokakadona oko mofikola natango oka nangalele nomunafikola umwe vali keengulu dofikola.

Oshiningwanima shovanafikola vatatu va kwata omunafikola umwe keenghono, osha ningilwe mofikola efimbo lokonguloshi, konima eshi ovanafikola va dja kostudi  yokonguloshi.

Omukulunhufikola Hafeni Jeremiya, okwa tumbulile kutya oshiningwanma eshi oshe ya polihaela eshi umwe womovatonateli vomihandjo va didilika kutya okaana oko kake mo momuhandjo.

Omutonateli womuhandjo okwa kendabala a ka konge oshihakanwa keengulu, nokwa shakena nasho mondjila yokuya komuhandjo.

Mokupulwapulwa vati oka hokola nee kutya oka kwatwa keenghono kovalumenhu vovanafikola vatatu.

Konima ovafekelwa ova tulwa moipandeko kopolifi, shoo oshihakwana tashi tembulwa po pofikola kovakwanedimo.