Opolifi moshitukulwa shaMusati oya lopotelwa omukainhu weedula 28 osho yo omulumenhu weedula 24 va tulwa moipandeko konima eshi va landififa omapangwe komupolifi womonanguwi Etitatu.Kakukutu komatanga opolifi mOmusati Ismael Basson okwa ti nakulandifa oingangamwifi komupolifi okwa hangika e na epangwe kolutu naashi opolifi ya kondjifa e i twale konduda yaye okwa hangika yoo natango omakaya oo inaa pikitilwa moshilongo. Basson okwa twikila kutya olukongo lopolifi vati ola ya fiyo okonduda yakaadona komufekelwa oko nako kwa ka hangika epangwe nomakaya. 

Ovafekelwa aveshe ova hangika noushako ve li 16 vepangwe leegalama 23 keshe kamwe, nove na ongushu yoN$1 150. Basson okwa ti natango ova hangika yoo noupakete vomakaya ve li 61 vongushu yoN$2 440. Ovafekelwa aveshe ovakalimo vaKapya, moshikandjohoololo shaGongo moshitukulwa shaMusati.

Aveshe ova tulwa moipandeko kopolifi nova holoka momhangu yOutapi onghela.Basson okwa yelifa kutya moshitukulwa ihava mono mo lela eelopota dihapu da nyika elongifo lomapangwe. 

“Ei ohandi hale kutya olopota yotete moule wefimbo, hatu kwata omunhu e li mekwatafano nelongifo lomapangwe e na ongushu yoimaliwa i fike opo. Shito ohatu kwata ashike omapangwe taa kosho oimaliwa i na ongushu iniingholi neenghono,” Basson ta ti. Okwa ti okwa hala okukunghlila ovanhu vomoshitukulwa shaye opo vaha kwatwe komhepo yelongifo nelandifo lomapangwe.Ta kunghulile yoo ovashiinda, novakwashiwana ava tava mono elongifo lomapangwe moshitopolwa ve li lopote meendelelo, manga inashi kwata ovanhu vahapu.

Okwa ti ou ta ka lopota oku na okupewa eamano.