Ouministeli woikwamina noikwanghono owa ti owa didilika ovakwashiwana, opamwe nomangeshefelo a yooloka tava landifa eembapila dokulandifa omahooli moshilongo.

Omupedukulunhu wouministeli oo Bryan Eiseb okwa ti, ava ve lipyakidila nokulandifa eembapila dokulandifa omahooli, shihe li palandulafano osho yo pamufindalandu edi da tulwa po kouministeli, ota va ningi oshinima shihe li paveta.

Okwa twikila kutya ovalandifi vahapu natango vati otava landifa eembapila meenhele inadi pumbwa okulandifilwa eembipila dokulandifa omahooli.

“Oshiwana osha pumbwa okuuda ko kutya ouministeli womahooli noikwamina oo ashike u na oshisho shokulonga nakeshe oshiima sha nyama komahooli moshilongo, ngaashi omahooli odisela nopetrol,” Eiseb ta ti.

Okwa twikila kutya oufemba oshoyo epitikilo lokulandifa omahooli ohali kala le likolela koinima yonhumba, oshoyo omalalakano a yooloka.

Okwa ti eembapila dokulandifa omahooli ohadi yandjwa yoo de likolelela kutya odashike.

Okwa ti ope na omapila hai ufanwa fuel retail, yanuniwa omahangano aa haa eta po omahooli noku a yandja kwaava ve na oshisho shokulandifa omahooli.

Vati ope na vali ombapila yofuel wholesale, ombapila ei vati ya nuninwa eengesha edi hadi landifa omahooli moshilongo.

Ope na yoo vali ombapila yofuel consumer installation, ei vati ya nuninwa ovanafaalama ve na eefalama hadi longwa omahooli oshoyo eemina domahooli.

Okwa twikila kutya eembapila edi ohadi yandjwa kovakwashiwana, di li koshi yokatendo komo2000 29(1) (2), nonghee vati ihadi dulu okulandifwa ashike ngaho.

Okwa ti yoo ondado yomahooli moshilongo ohai londo okudilila kokatendo ko1990 kekotamhango laNamibia.

Okwa ti eendado edi ohadi shendjwa keshe omwedi, nouministeli ohau fi oshisho keshe omwedi u kale wa yandja ouyelele koshiwana okudilila koikundaneki.

“Okulandifa eembapila dokulandifa omahooli oshiima sha ngabekwa moshilongo, shoo va li kashi li paveta,” Eiseb ta ti.