ONGWEDIVA – Ovanhu otava tula eemwenyo davo moupyakadi eshi tava ka likola oshuungu koshikunino shoinamwenyo kEtosha National Park nosho yo tava i meefaalama inava pewa epitikilo koovene vado.
Omukulunhu wopolifi koshitukulwa shaShikoto, Commissioner Teopoline Kalompo-Nashikaku okwa ti ombelewa yaye oya lopotelwa kombinga yovanhu tava ka likola oshuungu kEtosha Nationa Park osho shi li sha nyika oshiponga.
“KEtosha oku na oinamwenyo ya nyika oshiponga. Omunhu ota dulu okudipawa keenghoshi nosho yo okulika komayoka,” ta ti.
Okwa didilikwa efimbo e li ovanhu hava ka likola oshuungu koshitukulwa shaMusati, Oshikoto noKunene.
Ovanhu ohava ka konga oshuungu nelalakano lokulandifa nosho yo okulimonena oshivelelwa.
Oshuungu ohashi denge po omukaa nokuetela ovanhu oyuuyemo yoshimwaliwa molwaashi ohashi landwa unene.
Kalompo-Nashikaku okwa ti omwedi wa dja ko okwa lopotwa okamatyona keedula 13 ka ninga omafiku atano ka kana pefimbo kwa li tava likola oshuungu novadali vako kEtosha.
Okwa ti okamatyona oka monika komonima eshi opolifi ya kendabala oku ka konga.
“Okamatyona oka hangika ke li monghalo iwa popepi nomikunda di li pomudingonoko wEtosha.
Oka twalwa paife keumbo lovakulunhu vako,” ta ti.
Kalompo-Nashikaku okwa ti nonande ovanhu va pumbwa oshuungu shokuvelela nokulandifa, nava xulife po oku ka likola oshuungu kEtosha.
“Momufitu ohamu kala ovanambelewa va dja kouministeli womidingonoko tava ningi omapekapeko okuamena oifitukuti. Otashi dulu okueta omunhu a monifwe oshiponga kovanambelewa shaashi pamwe otava ti ombudi ye uya okudipaa oifitukuti ya amwena,” ta ti.
Omukulunhu wopolifi koshitukulwa shaKunene, Commissioner James Nderura okwa ti Etivali okwa lopotwa ovanhu 30 va hangika mofaalama kOutjo tava likola oshuungu inava pewa epitikilo kumwene wofaalama.
“Osha nyika oshiponga ngeenge ovanhu tava i mofaalama inava pewa epitikilo kumwene wofaalama,” ta ti.
Okwa ti oovene veefaalama vamwe ove na eembwa tadi dulu okumonifa omunhu oshiponga.
Okwa kumaida oshiwana opo shi kale tete tashi pula epitikilo kumwene wofaalama kutya ova hala oku ka likola oshuungu.
Nderura okwa ti omwedi Marsa naApilili koshitukulwa shaKunene ohaku mbolokotele omwaalu muhapu wovanhu tava di koitukulwa ya yooloka tava kongo oshuungu.