Omupopiliko wopolifi koshitukulwa shaMusati Sergeant Fillipus Haihambo okwa ti ovakainhu ovo unene va ninga oihakanwa yokukengelelwa keembanga ngeenge tava pula va kwafelwe okunana ko oshimaliwa.
Okwa ti opolifi ohai lopotelwa kombinga yovanhu ngeenge tava ka nana oshimaliwa keembanga tava kengelelwa nokukanifa oshimaliwa shavo.
“Ovanhu vamwe ove na oupyakadi wokulongifa eshina lokunana oshimaliwa. Ngeenge omunhu okwa pula ekwafo ohashi eta a kengelelwe,” ta ti.
Okwa weda po ta ti unene ovanhu hava tuminwa oshimaliwa kongodi shoEwallet ova ninga oihakanwa yokukanifa oshimaliwa shavo.
Okwa kumaida oshiwana opo shiha pule vali omakwafo komunhu keshe tava hange pombaanga shaashi ovanhu paife ove lininga oikengelela.
“Omunhu ngeenge oku na oupyakadi wokulongifa eshina lokunana oshimaliwa na pule omukeleli womaliko ta longele pombaanga,” ta ti.
Okwa weda po ta ti ovanhu nava pule omakwafo kovanailonga tava longele mombaanga ngeenge omunhu e li popepi nombaanga.
“Ovanailonga vomomaumbo komikunda ovo unene va didilikwa va taalela eshongo linene lokunana ko oimaliwa,” ta ti.
Haihambo okwa ti ovanhu nava xulife po okuya meenghundafana novanhu vehe va shi nosho yo okuyandja eengodi davo.
Efimbo keshe opolifi otai lopotelwa oibofa yovanhu tava tulwa mokatoo mwa kwatelwa ovakulupe ve li mopendjela opo va futwa oshimaliwa shavo.
Oshivike sha dja ko omulumenhu weedula 58 womunangeshefa hanga okwa tulwa mokatoo komulumenhu e mu dengela ongodi ta ti okwa findana oshimaliwa sheeN$15 000.
Omulumenhu ou okwa lombwela Kundana ta ti okudja opo okwa pulwa eenomola di li kokalata kaye kombaanga.
“Onde shi dimbuluka diva kutya ohandi popi noshikengelela. Onda dima ongodi yange,” ta ti.