OSHAKATI – Manga minista womidingonoko, eefuka nomapashiyono Indileni Daniel e lipyakidila nokulombwela omalelo eedoolopa osho yo ovaleli voitukulwa ve lipyakuduke oikungulu yombaadiilila, vo Ovashakakati otave limemesha ashike shaashi vo ove shi mana nale. 

Elelodoolopa laShakati ola tembula ovanhu ve li 180 okudja odula ya dja ko fiyo oneudo, ovo hava kala oihakanwa yefundja konyala keshe odula, molwaashi va dengela omalukalwa avo peenhele edi hadi yada omeva. 

Mayola wodoolopa Leonard Hango okwa ti eshi ove shi ninga diva shaashi inava hala ovanhu va ka ninge oinima mumwe nodula. 

Ovakalimo ava va tembulwa ova hololela Kundana nghee va pandula elelodoolopa eshi le va kufa meendabo domeva, va etwa komutunda. 

Albertina Shikolaye umwe womwaava va tembulwa okwa ti ye ponhele apa a li nale, shimha ashike odula ya loko kashona, yee oku li nale koshi yomeva. 

“Oinima yange alushe oya tuta ashike, yo imwe tai nyonauka komeva shaashi oya ola,” ta ti. 

Omanga omukalimo wumwe wedina Immanuel a holola ehafo laye osho yo olupandu lonhele yaye ipe oyo a pewa oshali. 

“Kanda li nde shi teelela oku shi ningilwa eshi monghalamwenyo yange. Okutya ngaho oku nda kufwa okwa li ndi li ko ndi li ponhele yange mwene, ame ohandi kufwa ko nokuli osho, handi ya ndi tulwe ponhele yange nde i pewa oshali shaMuhongi yo vali oi li poima ihapu yada omeva nandenande,” ta ti. 

Daniel okwa ti odula ya dja ko okwa li ku na omundilo oo wa li we lihanena Etosha, uhe shivike kutya owa li wa dja peni, nowa li wa hanauna shihapu. 

“Omundilo owa li wa dipaa oinamwenyo, wo tau xwike omiti odo di na oshilonga shakula mEtosha, nowa li wa fiya onhele tai monika nai,” ta ti. Okwa ti neduo okwa hala ovanhu ve litetuke nokuninga omapeekapeko onima yoludi la tya ngaha, nonghee ve na oku i kelela. 

Moiningwanima ei okwa weda mo yo efundja nokukunghilila ovaleli ve li keenhele hadi kwatwa kefundja ve lilongekide manga efundja inali ponokako opo va hangike va tula aishe nale peenhele. 

-taimihaihambo2000@gmail.com