“Unatje omwatje wa Tate wareme, wasuru warire owoo munoo Mama,” omukamburise umwe wombimbi watjirirwe ame i kamburisirire nao mOtjiningandu kehi omuramba moresevate ya Tjinene Osondaha ndazuko.
Ovaherero nOvambanderu ve tja: “oviungura vyomundu vi, kongorera omuini wavyo”. Tjingetjo oviungura vyondangere Mbundu Katuiisa Rukero vye mu kongorere mozondjira ze,okuza mOtjinene ngandu kotjirongo tje omuini Otjiṋinagndu, kehi yomuramba, aze serurwa naze yarwa ourenga kutja Ondangere i kapitire po.
Tjimuna Omuna wOmundu tjaa hiti mu Jerusarema ovimbumba tji vye mu yakura, avi yara oviyao mozondjira pu ma kapitira. Nandarire kutja kasuvisirwe pOzombuzovindimba, oro nambano ndiri Etjo rOzombangaṋe zOvaherero nOvambanderu, imba omuini kerivangere, Otjiṋingandu, okuza mOtjinene otjini ngandu mouparanga wehi pendje natjo nOkarukondwa kOmatoororero katjo, ovimbumba vya vazere mouingi nounyaṋu wavyo navi pe omuyaruke Ondangere Mbundu ondjozozikiro ndje mu pwire.
Ozombimbi kazombimbi, ondoro kandoro, onḓerera kanḓerera yopehi noyokoukambe. Ozombimbi momitjato wazo pekepeke ngandu kombimbi yovanatje ovazandu mba kaha mba tya kutja ombazu kai nokutjizembwa ko rukwao otja tji pe kondjwa. Tjikuume wa Kuapa, tjandje ope ri notjimbumba tjovarwe vombazu ovapyuuke va wangata ondangere nombimbi ndji hi nokupokera.
Ondangere ya tjirirwe amai suvisiwa Osondaha nda zuko muhoko munene. Oritjatano otji ya yatere mOtjinene otjini tji ya tjirirwe amai ritupuka okuza mOtjomuise. Mu yeere okuhaṋika nouye mbwi okuza nokukarauka kOmanga ya Kaoronga, Otjiuarongo tjorutenda, eye komurungu womayuva wongwatero yOmuna wOmundu ka kawira ae ri moviungura vyotjiwaṋa.
Rukuru ngunda amu hi ye ya oviṋa vyouye wanambano, ozongutirwa aaze mangwa momukova wongombe imwe ouhuze noingonekwa momuvanda. Tjingetjo ondjuwo yOndangere mongungu yayo ya kutjirirwe nomukova wongombe. Okuraisa kokutja ngu ma suvisiwa kamundu wakauriri nungwari omundu omunene womuvanda imbwi wondoto nu wina pendje na nao wari omunene mongamburiro yombazu otjondangere.
Ngwe mu yandjere kovaṱi novakuru ve omukurundu Seraue ngwa tjere eye wa ungurira omuhoko ne u tungu. Nambano otja tje he ri ko rukwao nai, tja sewa natjo okuhingira ku nooihe kutja ve pe otjiwaṋa omasa. Otjotjiri kehi yomatokero otjiwaṋa mu tjiri, mutjo mu mu nohaṋi, otjo matji hepa omasa wovaṱi novakuru. Indi tji tji hi nokuvezemba.
Kutja atji ha zembi ovaṱi novakuru tjimuna omuyaruke Ondangere Mbundu Katuiisa Rukero, eye wa vanga kutja pe zikamisiwe ombindi wina ku ma zemburukirwa. Oyo ndja twiirwe ewe rotjikoro.
