Ounona 400 va pewa omidjalo dofikola

Ounona 400 va pewa omidjalo dofikola

Auleria Wakudumo 

ONamibia Rare Earth, ehangano hali nduluka omamanya omeetuwa, omangenete noikwamalusheno ola yandja omidjalo dofikola mwa kwatelwa eendjato domambo kovahongwa ve li 400 va dja keefikola nhano da yooloka moKhorixas. 

Eefikola nhano da mona ekwafo ongaashi Eddie Bowe Primary School, Frans Frederick Combined School, Th.F !Gaeb Primary School, Versteende Woud Primary School noWelwitschia Primary School. 

Namibia Rare Earth oi na omina i li konima yodoolopa yaKhorixas nohai yandje shito ekwafo kovahongwa ava ve li momhumbwe meefikola da yooloka. 

Omukulunhu wehongo lounona ve li momhumbwe Aili Kapolo okwa holola ta ti keshe kodula ohava pula eefikola opo di tofe ovahongwa va pumbwa ekwafo mehongo.  “Ehangano ohali tumu omwaalu wounona ava tava kwafwa. Ohatu tukula nee omadina neefikola opo ovahongi ava ve shi ounona va tofe ounona ve li momhumbwe,” Kapolo ta ti.

Neudo, ehangano ola yandja eendjato nomudjalo we lixwa po kovahongwa 400 moKhorixas. 

-wakudumoauleria@gmail.com