Omundilo: Okapangelo kaMondesa ka pata

Omundilo: Okapangelo kaMondesa ka pata

Auleria Wakudumo 

Ouministeli wouhaku nonghalonawa owa shiivifa epato lokapangelo kashona kaMondesa moSwakopmund sha landula oshiponga shomundilo osho sha hanauna po ombinga imwe oufiku wonghela. 

Moule wefimbo okapangelo ka pata, oshiwana molukanda Mondesa otashi indilwa shi konge ekwafo lopaunamiti kokapangelo koTamariskia manga ta ka wapekwa. 

“Omafulo, engabeko loludalo, otaa ka monika kokapangelo ka-DRC omanga ovanaudu ava va pumbwa okumangwa ile okumangululwa oipute tava ka mona ekwafo koshipangelo shakula shaSwakopmund,” ouministeli tau holola.

Ouminsteli wouhaku owa holola kutya otau ka longela kumwe nouministeli woilonga noyeendifo opo va kwashilipaleke kutya okapangelo kaMondesa otaka ka wapalekwa nokuyakula ovakwashiwana meendelelo. 

Ovakwashiwana otava indilwa opo ve liufe komalombwelo a tulwa po pakafimbo. Oshiwana otashi indilwa yo shi lididimike molwaashi ouministeli owa teelela eenhele di kale di na ovanaudu vahapu molwokapangelo aka ka pata. Omundilo vati owa hanauna po omiti monhele yokupungulila omiti osho yo omambo a fimana omanga eenduda dokuyakulila noipangifo imwe inai pya komundilo. 

Olopota yopolifi oya holola kutya osheetifi shomudilo inashi shiivika natango nopolifi otai twikile omakonakono. 

Olopota oya holola yo kutya kape na omunhu a mona oshiponga momundilo ou.

-wakudumoauleria@gmail.com