OSHAKATI – Paulus Shimweefeleni weedula 53 a shiivika nawa Ninja nokwa kala eedula 26 modolongo okwa kumaida ovatamanekwa koshitaashi shopolifi shaShakati ta ti okukala modolongo itashi ti kutya omunhu ita dulu okulundulula ngeenge a mangululwa.
Shimweefeleni okwa popya onghela pefimbo a talela po ovatamanekwa 224 ve li mokakuma kOshakati. Okwa ti elalakano laye okukumaida ovanadolongo nghene ve na okulihumbata konima ngeenge ova mangululwa modolongo.
Shimweefeleni okwe lipyakidila nokutalela po ovanadolongo koitukulwa ya yooloka mwa kwatelwa ovanafikola.
Okwa lombwela ovatamanekwa kutya naye okwa li modolongo ashike okwa kala te lihumbata nawa fiyo ta mane ko eedula daye.
Okwa ti paife oha kufa ombinga momaudano eengonyo nelalakano lokuxwaxwameka ovanyasha va kale ve na ohokwe yomaudano.
“Okukala modolongo okwa longa nge omikalo. Paife inandi hala nokukwatwa komhepo yokulonga oimbuluma,” ta ti.
Shimweefeleni okwa ti paife oku li mehangano olo hali kwafele ovanadolongo omo paife ta ka didilika omashongo oo a taalelwa kovatamanekwa.
“Ohandi kundafana nombelewa yakakukutu kopolifi Inspector General Joseph Shikongo kombinga yomashongo aa a taalelwa kovatamanekwa nosho yo okukundafana nghene taa ka kandulwa po,” ta ti.
Okwa yelifa ta ti osha fimana ngeenge ovanhu ve li meedolongo tava kumaidwa molwaashi otashi kwafelele oku ke lihumbata nawa noxuxwaxwameka ovalumenhu vakwao vaha longe oimbuluma. Ovatamanekwa okwa li va mona omhito yokupula omapulo nosho yo okupopya omaupyakadi oo e li modolongo.
Omutamanekwa umwe okwa popya ta ti modolongo ove hadi mo neenghono naashi osha eta opo va nangale meenduda va finana mo. Omulumenhu a ninga eemwedi hetatu modolongo okwa ti ohava kala tava pula okumona ovakonakoni voibofa yavo ashike omukulunhu woshitaashi shopolifi ina hala.
“Modolongo otu li mo twa lundilwa. Otwa hala okupopya novakonakoni voibofa yetu,” ta ti.
Omukulunhu koshitaashi shopolifi mOshakati Chief Inspector Immanuel Iilonga okwa ti ovanadolongo ohava shakene novakonakoni voibofa yavo ngeenge tava i komhangu.
Iilonga okwa yelifa ta ti ina shi fimana omukonakoni ta i kodolongo opo a ka popye nomutamanekwa.
Okwa koleka ta ti oshoshili ova taalela eshongo lovatamanekwa vahapu itava wana mo vali modolongo. Okwa weda po ta ti efiku keshe ohava yakula omwaalu muhapu wovanhu tava tambulilwa modolongo.