Auleria Wakudumo 

Ovahongwa tava tengenekwa ve li po283 ova mona epango lounamiti pofikola Rundu Secondary School molwaashi taku fekelwa va lya oudio mekulo lofikola. 

Oshiningwanima eshi osha ningwa Etivali mosekundefikola yaRundu moshitukulwa shaKavango East. 

Edi oda kolekwa komukulunhu koshikondo shokukonakona oimbuluma mosh itukulwa shaKavango East, komufalapedu Bonifatius Kanyetu. 

Otaku hokololwa vati ovanafikola va hovela okweehama oufiku wOmaandaxa okudja kokulihonga konima yokulya ouvalelo. 

Kanyetu okwa holola kutya opolifi otai tengeneke oikulya ya ninga nai konima eshi okila yokutalaleka omo mu na oikulya inai longa Osoondaxa shaashi olusheno la li la wa ko modoolopa aishe yaRundu. 

“Eshi osho mutu sha eta oikulya i nyonauke nokukwatwa koudio shaashi oikulya oyo tuu oyo oya liwa kovanafikola vomomuhandjo,” Kanyetu ta holola ngaho. 

Opolifi oya ti omwaalu wovahongwa vahapu ovo tava fekelwa va lya oudio oukadona. 

Opolifi oya holola kutya ovahongwa va fika po 283 okwa li va lopotwa tava ehama nova mona epango mofikola ashike 15 ovo ashike va twalwa va ka mone epango lopaunamiti la wedwa po koshipangelo shepangelo shaRundu. 

Vavali vomovahongwa 15 ovo va ya koshipangelo ova tambulilwa meembete notava mono epango la wedwa po. 

Otaku hokololwa ovanambelewa vouhaku melongelokumwe novanambelewa vehongo tava ningi omapekapeko a wedwa po moshiningwanima eshi opo va mone osho sha eta oudio. 

Ovahongwa aveshe otaku hokololwa ve li monghalo i li nawa. 

-awakudumo@nepc.com.na