Auleria Wakudumo 

Maria Katumbe weedula 46 oha nduluka ondjema osho yo omaadi a fa owishi okudja meengongo. 

Katumbe oku li omunailonga womeumbo mOngwediva ashike okwa yambukile komukunda Ombafi mOmbalantu. 

Ongula inene, Katumbe oha kwata oxuxwa komulungu opo a ka toole eengongo meemwoongo dinini odo di li modoolopa yaNgwediva opo a ka teleke ondjema yaye. Omanga vahapu tava ende tava lyata eengongo, ye okuwete ongeshefa mudo. 

Eengongo oda fimana unene konooli shaashi ohadi eta omauwa mahapu novanhu tava mono mo oyuuyemo okudja mudo. 

Eengongo ohadi pi unene okudja muJanuali fiyo omuApilili lwaapo, pefimbo Shiyenga shaNangobe tai tilile omeva pedu. 

Eengongo ohadi kolwa okuyandja ongongola, okutelekwa opo di dje odjema osho yo okutendwa di dje omaxuku nodjove. 

Katumbe naye oha mono mo oyuuyemo okudja meengongo. Oha landifa ondjema yaye moukende vashona koN$25 omanga eelitela mbali di na N$200 ngeenge oya uka koushimba noN$150 kovalandi vo monooli. Okwa ti oha mono mo N$200 mefiku ngeenge she mu endela nawa. 

“Kashona oko handi mono mo haka kwafa nge okuf ila oshisho ovakwanedimo vange ve li omu-10 osho yo ovakwapata vali vamwe. Oha ka kwafa nge ngeenge ndihe na oshimaliwa mokati komwedi nomboloto younona keumbo,” Katumbe ta holola ngaho. 

Katumbe okwa holola nghene ha ningi ondjema yeengongo. Okwa ti oha kosho tete eengongo ndele te di tula momeva fiyo taa fuluka. Okudja opo ohadi di ko omeva ndele ta weda mo osuuka fiyo tashi eta oluvala sho sha fa tashi likwata. Ngeenge okwa hala okuninga omaadi manyenye, ohe shi kufa po omanga inashi li kwata unene. 

Nande ta mono mo okafilinga, okwa ti okulandifa keshe efiku kakupu. 

“Fimbo limwe oto i povanhu ashike kape na ou te ku pupu. Ohandi dimbuluka oshikando shimwe nda ya mondingosho opo nda mona po umwe ta penge N$50 molwaashi ohandi longo komake ashike mokutambula oshimaliwa onde shi kufwa ndele ovanhu tava lande eebiila davo,” Katumbe ta dimbuluka ngaho. 

Nande ongaho, ihashi mu teya omukumo. 

Katumbe ota indile epangelo opo li uye po neeproyeka domashina meedoolopa da yooloka okukwafela ovo tava nduluka oinima yavo. Okwa ti okwa hala okukala e na oundini va natekwa oumbapila ovo tava holola edina longeshefa yaye, onhele nonomola yongodi yaye opo a mone ovalandi vahapu. 

-awakudumo@nepc.com.na