Auleria Wakudumo
Ondangwa- mukurona pamberewa goministeli zonodoropa nekuliko nomukunda Nghidinua Daniel sivike kasipwire kakgeve mambo 64 aga gatunga (NHE ) National Housing Enterprises moOndangwa extension 25. Siruwo nye sosilika oso, age katente asi mukoso gomambo kuna kara ndiro unene yipo nye asi vahepa kuwizapo negano lyokuninka asi ava avagwana nzambi zonsesu vahepa nawo kuvareta mo vagwana mauwa gokugwana embo.
‘’ Embo nkenye apa kukara asi simwe esi notura muntu pelikwamo lyoge mekuliko, eyi kuna kara mulyo unene morwa kuna kara asi twahepa kugusapo ruhepo, omu natutulisapo elikwamo asi nkenye gumwe agwane mauwa ntani twahepa kutulisapo mpora, kutwara ekonomi lyetu, omu natukara paupolitika nompora, yimo ana kutanta Daniel. Age kahundilire vakansela wonondango asi varuganene kumwe naNHE, ntani Shack Dwellers Federation of Namibia omu navagava evhu vadikipo mambo aga vanakutungira ava ava gwana nonzambi dononsesu. Eyi nayininkisa tugusepo udigu wokutunga komarukanda aga vatura paveta asi gokutunga, omu vatungimo vetu vakara asi kwato ekeverero nkenye, yirugana yopaeparu nokugwana evango lyokutunga lyewa, yimo ana kuyinkondopeka Daniel.
Munasipundi gwaNHE Toska Sem katente asi mulyo unene kutura elikwamo lyangesi morwa kuwiza posiruwo simwe tupu ntani ndango zodoropa asi vahepa kugava kovantu eyi vanapumbwa pasirugana.
Omu muna hamene mambo morwa sinzi sovantu kutunda konomukunda doponze vawize kodoropa. ‘’ Muhoko guna kukura ntani vantu kuza unene kodoropa makura yina kara mulyo unene kugwana evango ndi asi embo lina wapere.
NHE kuna turapo nye elikwamo omu navakadika mambo gomanzi momvhura monodoropa yipo asi tugusepo udigu womambo omu nkenye muNamibia nagwana uwa wangesi.
Yimo ana kutanta Sem. Ogu nye kahuyungire kukwateramo owo vana gwana mambo, Lucia Heita age kapandwire NHE ntani ndango zodoropa zaOndangwa omu vana ninki nzodi zo 64 vaNamibia zikare zousili. Age kwatuliremo ehundiro pokatji kwaOctober / December mvhura zina puko. Ano kusika nye mwaJanuary, embo lyendi lina pu kudika.
Muna ngesefa gomomukunda ntani mugendesi Kambwa Trading David Sheehama katente asi awo kwamana kudika mambo aga komeho siruwo sika sike esi valizuvhire asi siruwo musinke navamana mambo ogo kugadika. Mambo aga ngano kuna wapere kumana kugadika momakwedi ntambali an oose yiyo nye tuna mana momakwedi gatano. ‘’ Ose kurugana kukwama oyo tuna kuhuyunga,’’ yimo ana kuhulisa ngoso.
-wakudumoauleria@gmail.com