Elelo laUkwanyama ola dimbuluka eedula 109 konima eshi Ohamba Mandume yaNdemufayo ya xulifa, mwa kwatelwa natango eehamba odo na do da xulifa. 

Oshivilo osha dimbulukiwa kOuhamba kOmhedi moshitukulwa shaHangwena oshivike sha dja ko. 

Efiku e li ola fimana mondjokonona yOvakwanyama. 

Omalenga a dja koikandjo ya yooloka, oovene vomikunda, ngoloneya waHangwena Kadiva Hamutumwa osho yo ovakwashiwana okwa li va holoka momwaalu muhapu okudimbuluka efiku laMandume. 

Efiku eli oha dimbulukiwa omudo keshe okuyandja efimaneko kohamba Mandume osho yo natango eehamba dikwao odo da tetekela nale. 

Mandume okwa xulifa omudo 1917 konima eshi vati eli yasha nondjebo koihole moAngola. 

Okwa kala Ohamba yOvakwanyama okudja omudo 1911 fiyo 1917. 

Efiku olo, Ohamba mekulu Martha Mwadinomho Kristian Nelumbu okwa li ekwetele komesho oshendo shokutalela po eembila deehamba odo da xulifa nale. 

Mwadinomho okwa ti popya ta ti efiku eli ola fimana mondjokonona yOvakwanyama shaashi ta li yandje efimaneko kOhamba Mandume mwa kwatelwa eehamba di kwao. 

“Onda pandula amushe eshi mwa fika okudimbuluka efiku eli. Ohatu twikile okuyandja efimaneko keehamba detu,” ta ti. Okwa kumaida oshiwana moshitunda shaye opo shi twikile okukala nombili noukumwe molwashi Mandume naye okwa li e hole ombili. 

fhamalwa@nepc.com.na