Oshiputudilo shoNamibia University of Science and Technology (NUST) osha yelifa kutya ovanafikola ava va dopa ile ava ve na eendjo dofikola, ile va hala okuliwedela ko komalihongo avo itava ka lola ehongo loshali, ove na okulifutila vo vene. 

Ouyelele ou owa dilila kovanambelelwa vomatambulo omoshiputudilo, konima eshi engwangwano la li le liteyela moshiwana shi na sha nomilandu dipe dehongo loshali. 

Omishangwa da yandjwa kovanambelewa koNUST oda yelifa kutya ngeenge omunafikola okwa dopa odula yaye aishe ye lihongo, oku na okulifutila ye vene shaashi okwa dopa. Ehongo loshali otali tyapulwa ashike kwaava opo tave litoto moshipudilo lwotete nova wanifa oitwa yokufutilwa oshali, osho yo ava va hangika tave lihongo nale ve li meedula ditivali nodititatu ndele inava dopa. 

“Ovanafikola ava opo tave litoto okuninga odjapo yoHonours degree lwotete moNUST, navo ova wanifa okufutilwa oshali, nande ove na nale eedjapo davo doBachelors,” onhumwafo tai yelifa. 

Ovanafikola ova teelelika va ke lishangife oshali, ashike ava veli moshikumungu sheendjo dofikola, ile vadopa ile va hala oku li wedalako eedjapo dakula ngaashi ohonours degree itivali ile ititatu, ova teelelika ve lifutile vo vene. 

-taimihaihambo2000@gmail.com