Auleria Wakudumo
Epangelo ola holola kutya ola tula moilonga omhangela yokuyandja oilonga kovanailonga vomomeva ve li 222 ovo va li va kanifa oilonga mehangano lokukwata eeshi hali ifanwa Walu.
Mexuuliloshivike, minista wounamapya nounaimuna, eeshi, omeva nomatalululo omadu Inge Zaamwani opamwe naminista wouyuuki noipambele yoilonga Fillemon Wise Immanuel ova kala omutumba novanailonga osho yo nomahangano okukwata eeshi oo e li oilyo yopologalama yepangelo hano oGovernment Employment Redress Programme (GERP).
Omupopiliko wouministeli wounamapya Romeo Muyunda okwa holola kutya oominista ova li tave linyika komilungu nomahangano aa nelalakano okuyandja oilonga yovanailonga yomomeva 222 ovo vehe na vali oilonga shaashi omaudafano avo oilonga e ya pexuulilo mehangano Walu Fishing.
Minista wounamapya osho yo minista wouyuuki ova li va holola kutya epangelo oli na ovanailonga vomomeva komutima aveshe ovo va kanifa oilonga paife naavo va kanifa oilonga monale.
“Epangelo otali twikile okukwashilipaleka kutya ovanailonga ova yakulwa pashili nopauyuuki moilonga yovo,” Muyunda ta holola ngaho.
Muyunda okwa holola kutya eeministeli adishe otadi kwashilipaleke kutya eedjo domomeva oda topolelwafana shi fike pamwe.
Epangelo ola ti itali ke lididimikila ovo tava ka ninga lunga itapula moshinima sha tya ngaha.
Epangelo eshi la kala omutumba nomahango anhe eeshi oo haa longele epangelo, omahangano okwa holola kutya oku na ehalo lokuyandja oilonga kovanailonga ovo.
Keshe ehangano otali ka pewa omukanda weudafano upe oo tau holola kutya otali ka kuta ovanailonga vangapi okukwafela epangelo okulwifa okuhahe na oilonga.
Minista wouyuuki okwa kunghilila omahangano opo a xulife po okukala taa lekele ovanailonga vavo moilonga tashi ningwa pomikalo inadi yela noda nyika oulingilingi.
“Ovayandji voilonga nava ye meenghundafana novanailonga ovo inava hala vali omanga inave va shiivifila kutya nava ye komaumbo,” minista ta holola ngaho.
Minista okwa dimbulukifa yo ovanailonga opo va kale ve shi nokuuda ko eembapila davo deudafano loilonga opo va shi ive eshi sha teelelwa kuvo omanga inava shaina.
-awakudumo@nepc.com