ONGENGA – Omukulupe womido 88 oye oshihakanwa shaxuuninwa movanhu vadipawa omadipao manyanyaleka kovakwapata vavo ve na oudu wopamadilaadilo moule weedula mbali, moshikandjohoololo Ongenga. 

Okudja omudo wa djako koshikandjohoololo eshi shili moshitukulwa shaHangwena omwa lopotwa ovanhu vatano va xulifa, nounona vavali va lemanekwa neenghono eshi va tetwa nomakatana kovakwapata vavo ovo hava tokulukilwa koudu womomutwe. 

Kansela woshikandjohoololo shaNgenga Mathew Shikongo okwa koleka oiningwanima ei. 

Oshiningwanima shinyanyalifa 

MEtitano, Omulumenhu we edula 26 e na oudu wopamadilaadilo vati okwa ponokela nokudipaa inakulu wedina Paulina Nawa e na omido 88 nekatana, e mu teta enyala ndele te mu ekele mediko lomundilo. 

Omulumenhu oye tuu ou vati okwa teta yoo okamatyona keedula 7 omaulu, noku monifa oshiponga momutwe okakadona komido 14. Oshiningwanima osha ningwa oshivike sha djako efimbo longula momukunda Os h ikuyu mosh itukulwa shaHangwena. 

Deputy Commis s i one r Melanie Mburu okwa koleka oshiningwanima eshi. Ooluxupe moshiningwanima eshi , aveshe voumeumbo limwe, ova tambulilwa moshipangelo shaShakati. Omufekelwa naye oku li moshipangelo ta mono epango lopamadilaadilo. 

Opolifi oya ti konima eshi okaana keedula 14 ka tetwa nekatana oka lotokela koilonga ya xe, okanano kashona oku dja neumbo lavo ndele ta ka lopotele xe. 

Pefimbo Kundana a talela po keumbo oko kwa ningilwa oshiningwanima eshi, Mwahafa Herman ou e li ou omona wanakufya okwa hokolola ta ti eshi a fika meumbo okwa hanga ina e li momundilo polupale a tetwa eenyala de li ka lekelwa. 

“Onda endelela ndele handi ku famo meme momundilo. Onda hanga ta fuda ashike ka kwa li ta popi,” ta ti. 

Okwa ti ina okwa xulifa efiku olo efimbo lokomatango kOshipangelo shaShakati. 

Okwa weda po ta ti okwa hanga omundilo wa haka shaashi okwa li tau tandavele lolupale. 

Okwa ti omufekelwa okwa dikulula po olupale ndele ta tema omundilo. 

Herman okwa koleka ta ti omufekelwa oku na oudu wopamadilaadilo shaashi omudo 2021 okwa li a tambulilwa moshipangelo shaashi a denga ina naxe. 

Okwa hokolola ta ti omufekelwa iha di meumbo lavo ashike okwe ya po Etitatu loshivike sha djako eu ya okutalela po inakulu. 

“Okwe ya nekatana laye li pe. Okwa fika efimbo lokomatango meumbo nokwa li a hafa okumona inakulu,” ta ti. 

Okamatyona keedula 10 oko ka hangika ka tumwa kOmungwelume efiku loshiningwanima sha ningwa oka hokolola ta ka ti eshi omufekelwa a fika okwa li ta pulwa kuina oo va dja naye kopate kutya oshike e kwete ekatana mokati kovanhu. 

“Meme okwa li ta kendabala a kufe ko ekatana ashike omufekelwa okwa li a hala oku mu teta nekatana. Okudja opo meme okwa efa ndele tai keumbo laye olo li mepya letu,” ta ti. 

Mongula eshi kwa sha lwopotundi 10 omufekelwa okwa longela inakulu omunyonena nounona vavali. 

“Onda hangika nda tumwa kumekulu keefikola. Ngeno onda hangilemo meumbo pefimbo loshiningwanima ngeno naame osho onda tetwa nomakata,” okamatyona ta ka hokolola ta kwena. 

Okamatyona oka ti ngeno efiku olo omufekelwa a fika okwa nyekelwe ekatana ngeno osho inakulu ina dipawa. 

Umwe omushiinda okwa hokolola ta ti efiku omufekelwa a fika momukunda wavo ova londa naye motaxi imwe okudja kOshakati ashike okwa pula kovanhu motuwa kutya oshike a homata ekatana mokati kovanhu ndele ta nyamukula ta ti ekatana laye ota li ka longa oshilonga shakula. 

Natango neudo, komukunda Okapumbu, koshikandjohoololo Ongenga okwa lopotwa omulumenhu weedula 30 e na oudu wopamadilaadilo a dipaa xe weedula 64 konima eshi e mu kutula omunino nombele. 

Komukunda Eengwena koshikandjohoololo shaNgenga natango okwa dipawa omukulupe a dipawa komutekulu waye e na oudu wopamadilaadilo. 

Omudo wa djako natango koshikandjohoololo Ongenga okwa lopotwa omulumenhu ou e li pata wongeleka yaCatholic koRundu a dipaa outekulu vavali konima eshi eva denga omitwe mosameende. 

Omulumenhu ou weedula 39 naye oku na oudu wopamadilaadilo. 

Konima yeemwedi mbali, omulumenhu weedula 27 e na oudu wopamadilaadilo okwa twalwa koshipangelo konima eshi kwa li a hala okudipaa xe naina komukunda Onghala B moshitukulwa shaHangwena onghela. 

Konima yoivike iva l i koshikandjohoololo shaNdola okwa lopotwa omulumenhu we edula 35 e na oudu wopamadilaadilo a xwika po eenduda meumbo, omo natango kwa li ekwete eonga a hala okudipaa ovaneumbo vaye. 

Okwatambulilwa moshipangelo ta pangwa oudu wopamadilaadilo. 

Neudo mo s h i tukulwa shaShana omwa lopotwa omulumenhu weedula 24 e na oudu wopamadilaadilo a ponokela ofikola ndele ta denge eetuwa dovahongifikola nokutatula omakende eengulufikola. 

Ekumaido okudja kopolifi 

Ovanhu ina va manguluka vali ngeenge ve li meumbo novanhu ve na oudu wopamadilaadilo shaashi ova tila okudipawa. 

Ovashiinda navo ina va manguluka eshi va tila okuponokelwa nomakatana. 

Opol i fi oya kumai d a oshiwana ha shi di novanhu ve na oudu wopamadilaadilo opo shikwashipaleke kutya tava nu omiti davo efiku keshe ngaashi naana sha ufwa keendokotola. 

Oshiwana osha kumaidwa opo shi lopotele opolifi ngeenge sha didilika omunhu pomudingonoko wavo tau like omadidiliko oudu wopamadilaadilo. 

fhamalwa@nepc.com.na