“Ovandu mave ndji zeri nu tji mbe ya ku wo mave tupuka nave kawama kehi yoviṋa mbi mavi ndji tjayere ku wo.”

Rukuru inga kari okahakwa kokutja hapo otjikwaye tji tji zerwa nu tji tje ya ovandu tji ve tupuka ave kapaha pu mave haama kutja atji ha ṱunu ku wo? Otjo otjiṋa tji tje rivanga tji tji ya moruveze tjimuna indwi mu turi notjo nai mOnamibia tji tja undjwa orure tji kara ozombura nḓa hingi inḓa mOnamibia atja rira otjiheṋa. 

Tji tje yere okuuta komueze mbwa zuko na imbwi, tja isire ozondambo nḓe he ri ozonḓerwa mouparanga wehi ngandu motjihuro. 

Tji tja isire ovature votjihuro ohogongora ihi Otjomuise tjiva momaturiro pekepeke morupanda ngunda tjiva nandarire kutja ve nopoṋa pu va ri ava wama, avari moṱapiṱapi nomauini wawo aye nyonwa. 

Nandarire kutja omuyenda ngwi tje yere tjandje ponganda imwe ndjo ovandu kave mo, va ya komasuviro, omuyenda ngwi kaatjere kape novandu ponganda na tjiti otja tje tjita nu tji tjiri tjimwe tje hi na maa zerirwa. Ai sa onyoneno kombunda ye yomitutu tjiva mbya putuka nomauini womomatuwo nga aye nyonwa. Pu mape hee kokutja imba mbe ungurisa omatuwo nga tji mave kotoka maveeku rihaka kotjiṋa otjihanduze tji. 

Umwe ngwa ṱunwa i yomuyenda ngwi omiṱiri posikore indji Ogoreangaba mOtjomuise, Ivory, mu mu nomaputuriro womitutu vyetuwo me hongera Otjiherero. Ma tja, tje rihakere koumba mbwi wa twamene ombameno muye ndje na yo ngamba. Ouṋingandu tjandje ovahongwa kave mo ve ri komayuva womasuviro. 

Mape tja osikore tji mai paturuka pendje nombameno yovahongwa ve mbu mave ya okurihaka motjihimangongo hi, wina mape sokutja eye ma kara notjiungura tjokuvehuhumina otjovandu wina mbu mave ye kutoora ombameno tjimuna eye nai ndje nayo. 

Ndji ma iririre ko onḓeu tjinga ava rire ovandu tjimuna ovomorupanda mbe hi netuwo rawo oveni mu mave hongerwa nu ngwari amave rire ovandu overitjingise momatuwo yarwe pekepeke. 

Mu nao eye otji me riyarikana kovanene kutja ve tare kutja mave vatere vi nandarire kutja nai ohoromende ya twa ko omake okutungurura omatuwo nga ṱukuṱukire. Omengi wawo wina nge ha vazerwe mongaro ombwa tjinga ozikore ndji nai aya tjiti ozombura o-64.