Festus Hamalwa
Omukulunhuwiliki wouhaku moshitukulwa shaHangwena John Hango okwa ti malaria onghee ngaa ta twikile nokulopotwa komikunda da yooloka eshi neudo ovanhu 349 va monika oshidu malaria omanga omudo wa dja ko ovanhu 930 okwa li va monika Malaria.
Hango okwa ti oivike yootete yomwedi ou omivalu dovanhu tava kwatwa kumalaria okwa li da londa pombada.
Okwa ti omudo wa djako moshitukulwa shaHangwena omwa lopotwa efyo lomunhu umwe a fya kumalaria koshipangelo shaNgela.
Okwa ti omikunda edi dili kombinga yokeengamba odo dimwe da didilikwa kuna ovanhu vahapu va monika oshidu shamalaria unene tuu ovakwashiwana vo vaAngola eshi hava kala taveu ya okukonga omayakulo opauhaku moshilongo.
Okwa hokolola ta ti ounona veedula okudja punanho nounona veli koshi yeedula dananho ovo va didilikwa va ninga oihakwa yoshidu malaria eshi hava kala tava lika keemwe oule efimbo lile ngeenge va nangala.
“Ombelewa youhaku oya ninga eenghendambala dihapu okukondjifa malaria eshi twa kala nokutuma ovanailonga woundjolowele komikunda edi da didilikwa dina malaria opo va ka yandje ouyelele moshiwana nghee shi na okukala sheli amena kumalaria,” Hango ta ti.
Hango okwa ti ovanailonga wouhaku ova pombombela omaumbo ayeshe komikunda kwa monika malaria opo kukelelwa endavelo loshidu omalaria.
Okwa kunghulila oshiwana opo shi kaleke po eenhele davo da yela efimbo keshe, novadali opo va kwashipaleka kutya ounona vavo ove li mefiloshisho okukala va tuvikilwa meenete dokukelela eemwe.