Ouministeli wouhaku owa dimbuluka oshikondo shovapangi moNamibia alishe koonono, konima eshi wa yandja omidjalo dokoilonga da koya po 15 000. 

Eandjakanifo lomidjalo ola tameka nale oshivike eshi, noipangelo imwe ei inai mona natango, ouministeli owa koleka kutya omidjalo od ili mondjila. 

Umwe womovapangi Jesaya Kaume okwa ti ye nghee ngaho a manene elihongo laye konima yeedula da koya punhano paife ina mona nale omudjalo woshali. 

“Onda kala ashike handi lande, opamwe novanashilonga vakwetu,” ta ti. 

Kaume okwa twikila nokuyelifa kutya okulanda oikutu yoilonga inashi kala lela oshinima shipu kuye. 

“Shaashi omudjalo woupangi omudjalo oo hau djalwa efiku keshe, omo nokuli omunhu ho dulu oku u djala okudja Omaandaxa fiyo Osoondaxa. Ohashi pula nee omunhu u kale u na eehema dihapu, odo natango dihe kwete okukulupa u li shune kofitola, shaashi keshe fiku oi li kolutu, yo vali ohai pula okukoshwa nokukangulwa efimbo keshe,” ta ti. 

Kaume okwa holola kutya okwa pandula epangelo neenghono moku va dimbuluka, nokwa hala vaha dimbiwe. 

Minista wouhaku Dr Esperance Luvindao okwa ti omidjalo inadi pewa ashike ovapangi, ndele eendokotola nakeshe tuu ou ha longo moshipangelo naye okwa putulwa. Okwa kunghilila ovanashilonga kutya, nande va kale tava taima momidjalo davo dipe, ndele itava kwafa ovanhu nombili kashi na eshi tashi kwafa. 

“Djaleni mwa fewa shili, ashike tuleni ovanaudu tete komesho osho yo oilonga hamu longo. Kwafeni oshiwana nawa nonombili,” ta ti. 

-taimihaihambo2000@gmail.com