Ovapolifi itava ningilwa omakonakono momunyeka wokawe – Mutota

Ovapolifi itava ningilwa omakonakono momunyeka wokawe – Mutota

Omupedukakukutu kopolifi Inspector General Elias Mutota okwa koleka ta ti kape na ovanambelewa vopolifi tava ningilwa omakonakono mekwatafano lomunyeka wokawe kehangano loNAMDIA.

NAMDIA ehangano hali tuvikile okawe ngeenge ka dja keemina.

Meenghundafana va ninga naKundana onghela Mutota okwa yelifa ta ti ovafekelwa ovo ashike tava ningilwa omakonakono kopolifi ndele kashi shi ovapolifi ovo va fika koshiningwanima shomunyeka wokawe.

“Ombelewa yange inai lopotelwa kombinga yovapolifi va kufa po ouwe,” ta ti. 

Olomakaya okwa lopotwa ovalumenhu vane va ponokela eembelewa doNAMDIA efimbo lokomatango koWindhoek  ndele tava vake mo ouwe ovo hava di keemina.

Fiyo opapa kape na ouyelele kutya ouwe vangapi va vakwa po.

Poshiningwanima opa dipaelwa omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57.

Francis okwa yashwa nondjebo momutwe kovafekelwa pefimbo kwa li e li kombelewa ta longo.

Opolifi oya hokolola tai ti pefimbo loshiningwanima umwe womovafekelwa Max Endjala okwe liyasha nondjebo meembelewa doNAMDIA eshi a mona kutya okwa fitikininwa mo kopolifi.

Okwa ka xulifila koshipangelo efiku tuu oshiningwanima sha longwa.

Endjala okwa li omunailonga kehangano loTrustco kwa li ta longele koWindhoek.

Omufekelwa umwe okwa tambulilwa moshipangelo shaashi a mona oshiponga omanga omufekelwa umwe okwa faduka po.

Opolifi oya ti mufekelwa mukwao, Joel Angula ou a kwatwa po pefimbo a li navakwao vane okwa anyenwa omhito yokulifutila mo modolongo.

Angula okwa holoka momhangu yaKatutura koWindhoek Etivali. 

Oshibofa shaye osha undulilwa komafiku 23 May 2025 opo ku ningwe omakonakono omoule. 

Omhangu oya ti Angula ita pewa omhito yokulifutila mo molwaashi oshiwana oshe mu tila nosho yo okuya omakonakono opolifi moshipala.

Ota tamanekelwa oshibofa shedipao, oumbudi wokawe.

Omakonakono opolifi otaa twikile moshiningwanima eshi.

fhamalwa@nepc.com.ma