Auleria Wakudumo
Okakomisi kokutenda nokutalulula eengaba moNamibia oka yelifa kutya kape na oshitukulwa shipe tashi ka totwa po, ashike otapa ka totwa oikandjohoololo I li 10 osho tashi ka etifa opo oitukulwa iheyali i tendululwe. Eshi osha hololwa komunashipundi wokakomisi, Omutokoli Petrus Unengu pefimbo ta yandje olopota kOmupresidente Nangolo Mbumba Etivali moshilandopangelo.
Okakomisi oka holola kutya oshilongo inashi pumbwa oku wedela kitukulwa 14 oyo ilipo nale. Otwa mona omaindilo mahapu okudja koitukulwa yonhumba opo vati oitukulwa imwe i tendululwe molwomtomheno onhumba nongadi.
Oitukulwa ya hala okutopolwa ongaashi Oshikoto, Kunene, Khomas, Zambezi, //Kharas noHangwena.
Ngoloneya woshitukulwa shaZambezi Lawrence Sampofu okwa twa kumwe novakwashiwana opo eengamba davo naKavango East di shune koMukuvi shaashi vati ovanhu vavo vamwe ova patelwa meni leengaba daKavango East.
Ovakalimo vomoshitukulwa shaShikoto ova hala oshitukulwa shi ninge oitukulwa ivali. Ova ti eshi otashi kwafele okueta omayakulo popepi noshiwana nexumokomesho moshitukulwa.
MOhangwena ova hala vati Okongo i ninge oshitukulwa shi ilile omanga moKunene va hala oshitukulwa sha tukulwa moitukulwa ivali. Shimwe vati otashi ifanwa ngeno Kunene North noKunene South. Vati ova hala Kamanjab, Outjo, noKhorixas i kale moKunene South.
Natango vati elelo lopashitukulwa moKavango East ola indila opo oshitukulwa shi tukulwe shi ninge oitukulwa ivali. Ova pula yo vati ku wedelwe oikandjohoololo molwomwaalu muhapu wovakwashiwana moshitukulwa nokueta omayakulo popepi noshiwana. Oikandjohoololo va hala ya topolwa ongaashi Mukwe, Ndiyona, Ndonga-Linena, Mashare, noRundu Urban, keshe imwe vati i ninge oitukulwa ivali.
Moshitukulwa shaKhomas, ova pula vati etepolo loshikandjohoololo shaSamora Machel molwomwaalu wovakwashiwana oo tau tengenekwa wa pitilila 92 401 opo i ninge oitukulwa ivali osho shimwe vati tashi ufanwa Otto Nankudhu. A tala omaindilo aeshe a ningwa, Unengu okwa kumaida epangelo opo liha wedele oitukulwa 14 oyo i li po nale molwomwaalu wovakwashiwana moshilongo ashishe osho yo oshimaliwa tashi ka dja moshikefa shepangelo.
Olopota ya yandjwa kokakomisi kokutenda eengaba otai ka talululwa nokupitikwa komupresidente Nangolo Mbumba.