Oosasiona dhopolisi 14 dha tungwa koomilliona N$300

Oosasiona dhopolisi 14 dha tungwa koomilliona N$300

ONHELEIWA – Oomilliona dha konda poN$300 odha longithwa okutunga oosasiona dhopolisi 14 moshitopolwa shaMusati.

Ndhoka odha popiwa kungoloneya gwoshitopolwa shaMusati Erginus Endjala sho a li ta  patululwa oshitaasi shopolisi kOnheleiwa koshikandjohogololo Etayi.

“Epangelo otali longo nuudhiginini okweeta omayakulo popepi natse, opo tu vule okukwathelwa ngaashi naanaa twa tungilwa osasiona ndjika,” ta popi ngaaka.

Endjala okwa kumagidha oshigwana shi kale aluhe tashi longitha ombelewa ndjoka nuunene okulopota iiningwanima iiwinayi tayi holoka momundhingoloko moka.

“Out na aayiyambi yopolisi mboka taya longo oshilonga oshinene okushonopaleka iimbuluma momindhingoloko dhetu ihe oye li mo taya tukwa kutya oombwa dhopolisi, oopapeta nosho tuu,’’ ta nyenyeta ngaaka.

Ta ti shoka kashi li mondjila, ashike ngele ya adhika kuudhigu momagumbo gawo, yo otaya ithanwa ya gandje omakwatho gomeendelelo.

Endjala okwa kumagidha oshigwana shi mange uukuni kumwe shi kandule po iimbuluma moshitopolwa.

Kakukutu komatanga gopolisi Joseph Shikongo ngoka a patulula pambelewa osasiona ndjoka okwa ti oya tungwa koomiliona heyali niihupe.

“Osasiona ndjika oya tungwa po okugandja omayakulo koshigwana, nelakano lyokukandula po uupyakadhi wa taalela aakalimo osho wo okukaleka po ombili,” ta popi ngaaka.  

Shikongo okwa ti, oshitaasi shika osha tungilwa ombelewa yaapolisi, oondunda dhokulala, okombitha osho wo ehala lyokuningila iigongi.  

Ta ti, opolisi ndjoka okwa li ya tameke okutungwa muFebuluali omumvo gwa zi ko e tayi pu momasiku 23 gaAguste omumvo gwa yi.

Omukuluntu gwopolisi moshitopolwa shaMusati Ismael Basson okwa kumagidha aapolisi ya kale taya yakula oshigwana kehe posasiona yopolisi moshitopolwa.

“Inamu shunitha ko we oshigwana uuna tashi pula omayakulo naya kwathelwe kehe mpoka taya iyadha,” ta popi ngaaka.

Ta gwedha po kutya mbyoka iilonga yopolisi okutuma oshipotha hoka sha ningilwa nenge hoka shi na okukonaakonwa.

Aakwashigwana ya li ya gongala nokutaamba ko opolisi yawo ompe oya li ya holola enyanyu.

vkaapanda@nepc.com.na